మహిళను కారులో బలవంతంగా తీసుకెళ్లి అత్యాచారం, హత్య చేసిన ఘటనలో పోలీసులు.. నిందితులను పట్టుకున్నారు. ముగ్గురిని అరెస్ట్ చేసి రిమాండ్ పంపినట్లు మాదాపూర్ డీసీపీ వెంకటేశ్వర్లు చెప్పారు. సంగారెడ్డి జిల్లా రామచంద్రపురం మండలం కొల్లూరు తండాకు చెందిన ప్రేమలత అనే వివాహిత తన తల్లి గారి ఇల్లైన మియాపూర్లోని న్యూ కాలనీకి వచ్చింది.
ఈనెల 3న ఆమెకు పరిచయమున్న కొల్లూరు తండాకు చెందిన మధు నాయక్ ఫోన్ చేసి మియాపూర్ చౌరస్తాకు రావాలని కోరాడు. అతని కోరిక మేరకు ఆమె మియాపూర్ చౌరస్తాకు వచ్చింది. అమీర్పేట్ నుంచి మియాపూర్ చౌరస్తాకు కారులో వచ్చిన మధు నాయక్, సింగం ఆనంద్ అలియాస్ తను యాదవ్, తాలూరి కుటుంబ రెడ్డి ప్రేమలతను బలవంతంగా కారులో తీసుకెళ్లారు.
కొల్లూరు గ్రామం సమీపంలోని రేకుల షెడ్డులో ఆమెను ముగ్గురు బలవంతం చేసి అత్యాచారం చేశారు. ఈ క్రమంలో ప్రేమలత తలకు బలంగా గాయం తగలడం వల్ల ఆమె అక్కడికక్కడే మృతి చెందింది. నిందితులు మృతదేహాన్ని అక్కడే ఉంచి.. వచ్చిన కారులోనే వెళ్లిపోయారు. ప్రేమలత ఇంటికి రాకపోవటంతో ఆమె తండ్రి పోలీసులకు ఫిర్యాదు చేశారు. మిస్సింగ్ కేసు నమోదు చేసుకున్న పోలీసులు విచారణ చేపట్టారు.
ఇంతలో కొల్లూరు సమీపంలో మహిళ మృతదేహం ఉందని పోలీసులకు సమాచారమొచ్చింది. ఘటనా స్థలికి వెళ్లి విచారణ చేయగా.. ప్రేమలత మృతదేహంగా గుర్తించారు. కాల్ డేటా, సీసీ కెమెరా ఫుటెజ్ ఆధారంగా పోలీసులు నిందితులను అరెస్టు చేశారు. వారి నుంచి ఒక కారు, నాలుగు సెల్ఫోన్లు స్వాధీనం చేసుకున్నారు. కాగా ప్రేమలత భర్త కొంతకాలం క్రితం మృతి చెందాడు. ఆమెకి ఇద్దరు పిల్లలున్నారు.
ఇదీ చదవండి: గంగుల శ్రీనివాస్ అంతిమయాత్రలో బండిసంజయ్, ఆర్వింద్, డీకే అరుణ
