రాజన్న సిరిసిల్ల జిల్లా‌లో వరుస నేరాలకు పాల్పడుతూ జైలుకు వెళ్లొచ్చిన నిందితుడు ఇటీవల హైదరాబాద్‌లోని అత్తారింటికి వచ్చి చేతిఖర్చుల కోసం ఓ పాన్‌షాపు, మరో చికెన్‌ దుకాణంలో చోరీకి పాల్పడి ఎల్బీనగర్‌ పోలీసులకు చిక్కాడు.
సిరిసిల్లలోని సుందరయ్యనగర్‌కు చెందిన గిడ్డూ సింగ్‌ అలియాస్‌ గోవింద్‌సింగ్‌(35) స్థానికంగా నేరాలకు పాల్పడి 21సార్లు అరెస్టయ్యాడు. 2 హత్యకేసులు, అత్యాచారం కేసు, గుడుంబా అక్రమ రవాణాకేసు, ఇళ్లలో చోరీ కేసులున్నాయి. ఈ జనవరిలో జైలుకెళ్లి ఫిబ్రవరిలో విడుదలైన గిడ్డూసింగ్‌... ఇటీవల నగరంలోని రాజీవ్‌గాంధీనగర్‌లో ఉండే అత్తారింటికి వచ్చాడు. చేతి ఖర్చుల కోసం ఎల్బీనగర్‌లోని బస్టాండ్‌ వద్ద ఉన్న ఓ పాన్‌దుకాణంలో చోరీ చేయడంతోపాటు మన్సూరాబాద్‌ సాయినగర్‌లోని చికెన్‌ దుకాణంలో గల్లా పెట్టెనూ కొల్లగొట్టాడు. సీసీ ఫుటేజీ ఆధారంగా ఎల్బీనగర్‌ పోలీసులు నిందితుణ్ని శనివారం అరెస్టు చేసి రిమాండుకు తరలించారు.
- ఇదీ చూడండి : మాటలతో ఉబ్బిస్తూ.. ఖాతాల్లో ఊడ్చేస్తూ..!
