ఓయూ విద్యార్థిపై ఎమ్మెల్యే బాల్కసుమన్ అనుచరుల దాడి

ఎమ్మెల్యే బాల్కసుమన్ అనుచరులు తనపై దాడి చేశారంటూ సురేష్ యాదవ్​ అనే ఉస్మానియా యూనివర్సిటీ విద్యార్థి పోలీసులకు ఫిర్యాదు చేశాడు. విద్యార్థి సమస్యలపై ప్రశ్నించినందుకే తనపై దాడి జరిగిందంటూ ఆరోపించాడు.

ఓయూ విద్యార్థి సురేష్ యాదవ్​.. ఎమ్మెల్యే బాల్కసుమన్ అనుచరులపై పోలీసులకు ఫిర్యాదు చేశాడు. ఉస్మానియా క్యాంపస్​లో భోజనం చేసి.. పడుకుంటుండగా.. రాత్రి 11.30లకు.. ఎమ్మెల్యే బాల్కసుమన్ అనుచరులు తనపై దాడి చేశారంటూ సురేష్ తెలిపాడు. సుమారు 20 మంది మారణాయుధాలతో తనను వెంబడించారని... భయంతో బయటకు వెళ్లి రీసెర్చ్​ సెంటర్​ వద్ద చెట్లలో దాక్కున్నట్లు వెల్లడించాడు.

తెరాస పార్టీని విమర్శిస్తే నిన్నే కాదు ఎవరినైనా చంపుతామంటూ బెదిరించినట్లు పేర్కొన్నాడు. విద్యార్థుల సమస్యలపై ప్రశ్నించినందుకే తనపై దాడి జరిగిందంటూ ఆవేదన వ్యక్తం చేశాడు. ఈ ఘటనపై పోలీసులకు ఫిర్యాదు చేశామని తెలిపాడు. వారి నుంచి తనకు ప్రాణహాని ఉందని... వెంటనే వారిని అరెస్ట్​ చేయాలని సురేష్ కోరుతున్నాడు.

ఇదీ చూడండి: లైవ్ వీడియో: పట్టపగలు నడిరోడ్డుపై దారుణ హత్య