కల్తీ కల్లు కల్లోలం: 212 మందికి అస్వస్థత, ఒకరు మృతి

వికారాబాద్ జిల్లాలో కల్తీ కల్లు కల్లోలం రేగింది. ఒకరు మృతిచెందగా.. చాలా మంది ఆస్పత్రి పాలయ్యారు. కర్నాటక నుంచి ఆల్పాజోలం, క్లోరోఫామ్ వంటి మత్తు మందులు తీసుకొచ్చి కల్లులో కలుపుతున్నారని ఆరోపణలు వెల్లువెత్తాయి. ఆ కల్లు తాగడం వల్లే ఒకరి ప్రాణం పోయిందని... వందల మంది ఆస్పత్రుల పాలయ్యారని స్థానికులు చెబుతున్నారు. అస్వస్థతకు గురై తీవ్రమైన లక్షణాలతో బాధపడుతున్న 79 మందికి వివిధ ఆస్పత్రుల్లో చికిత్స అందిస్తున్నారు.

వికారాబాద్‌లో కల్తీ కల్లు తాగి ఒకరు మరణించారు. 212 మంది అస్వస్థతకు గురయ్యారు. పరిస్థితి తీవ్రంగా ఉన్న 79 మంది వివిధ ఆస్పత్రుల్లో చికిత్స అందిస్తున్నారు. కల్లులో మత్తు పదార్థాలు కలపటమే కారణమని తెలుస్తోంది. వికారాబాద్, నవాబ్ పేట్ మండలాల్లోని 18 గ్రామాల్లో నలుగురు గుత్తేదారులు కల్లు వ్యాపారం నిర్వహిస్తున్నారు. నవాబ్ పేట మండలంలోని చిట్టిగిద్దలో డిపో ఏర్పాటు చేసుకొని కల్లు తయారు చేస్తున్నారు. అక్కడి నుంచి డీసీఎంలు, ఆటోల్లో ఇతర గ్రామాలకు సరఫరా చేస్తున్నారు. కర్ణాటక నుంచి ఆల్పాజోలం, క్లోరోఫామ్ వంటి మత్తుమందులు తెచ్చి కలుపుతున్నారు. ఆ కల్లు తాగటం వల్ల మెదడు, నరాల వ్యవస్థ దెబ్బ తింటుందని వైద్యులు తెలిపారు. అలవాటు పడితే ఒక్క రోజు కల్లు లేకపోయినా... పిచ్చి పిచ్చిగా ప్రవర్తించడం, మూర్ఛ రావటం వంటి లక్షణాలు బయటపడతాయని వివరించారు.

కల్లు వ్యాపారులతో చేతులు కలిపి...

రెండేళ్ల క్రితం తాండూరుతోపాటు పరిసర గ్రామాల్లో..... కల్తీకల్లు తాగి ముగ్గురు చనిపోయారు. వంద మందికిపైగా అనారోగ్యం పాలయ్యారు. అబ్కారీ శాఖ అధికారులు కల్లు వ్యాపారులతో చేతులు కలిపి... వారిని వదిలేస్తున్నారని ఆరోపణలున్నాయి. రాజకీయ ఒత్తిడి కారణంగా ఎలాంటి చర్యలు తీసుకోవట్లేదని విమర్శలున్నాయి. ఇక వికారాబాద్, నవాబ్ పేట మండలాల్లో కల్తీకల్లు బాధితుల సంఖ్య పెరగడంతో అధికారులు రంగంలోకి దిగారు. చిట్టిగిద్దలో కల్లు డిపోను జప్తు చేశారు. 12 గ్రామాల్లో నమూనాలు సేకరించి ల్యాబ్ పంపించినట్లు వికారాబాద్ ఆబ్కారీ శాఖ పర్యవేక్షకుడు వరప్రసాద్ తెలిపారు.

తొలుత 10 మంది..

వికారాబాద్ ఆస్పత్రికి శనివారం తొలుత 10 మంది కల్తీకల్లు బాధితులు వచ్చారు. వీరిలో 8మందిని ప్రాథమిక చికిత్స చేసిన అనంతరం వైద్యులు ఇంటికి పంపారు. ఆ తర్వాత బాధితుల సంఖ్య క్రమంగా పెరిగింది. వికారాబాద్ మండలంలోని ఎర్రవల్లి, పెండ్లిమడుగు, కామారెడ్డిగూడ, నారాయణపూర్‌, కొత్తగాడి గ్రామాల నుంచి బాధితులు ఆస్పత్రిలో చేరారు. నవాబ్‌పేట మండలంలోని చిట్టిగిద్ద, ఎక్‌మామిడి, కుమ్మరిగూడ, మందన్ పల్లి, మూలమాడ, అర్కతల చించల్ పేట నుంచి బాధితులు ఆసుపత్రిలో చికిత్స పొందుతున్నారు. పెండ్లిమడుగులో కృష్ణారెడ్డి అనే వ్యక్తి మృతిచెందాడు. కలెక్టర్ పౌసుమి బసు, ఎమ్మెల్యే ఆనంద్ బాధిత గ్రామాల్లో పర్యటించారు. మెరుగైన చికిత్స అందించాలని వైద్యులకు సూచించారు.

కల్తీ కల్లు విక్రయాలపై కఠినచర్యలు చేపట్టాలని స్థానికులు కోరుతున్నారు.

ఇవీ చూడండి: రైతుబంధు పథకానికి మరో 208 కోట్లు విడుదల