హైదరాబాద్‌ కొండాపూర్‌లో విధులు నిర్వహిస్తున్న గచ్చిబౌలి ట్రాఫిక్ హోంగార్డు మల్లేశ్‌కు దొరికిన ఐదు తులాల బంగారాన్ని పోలీస్‌స్టేషన్‌లో అప్పగించి తన నిజాయతీని చాటుకున్నాడు. దీనిపై నగరంలోని మూడు కమిషనరేట్లలో కేసు నమోదు కాకపోవడంతో పోలీసులు సామాజిక మాధ్యమాల్లో సమాచారం అందించారు.
దీంతో ఆ బంగారు తమదేనంటూ యూసఫ్‌గూడలోని కార్మిక్‌నగర్‌కు చెందిన మమతా, నరేందర్ దంపతులు గచ్చిబౌలి పోలీసులను ఆశ్రయించారు. హఫీజ్‌పేట్‌లోని తమ అమ్మవాళ్ల ఇంటికి వెళ్లి తిరిగివస్తుండగా కొండాపూర్‌లో బస్సు ఎక్కేటప్పుడు పడిపోయి ఉంటుందని తెలిపారు. బంగారు తమకు అందేలా చేసిన హోంగార్డు మల్లేశ్‌కు ఆ దంపతులు కృతజ్ఞతలు తెలిపారు.
