విద్యార్థులను పావుగా వాడుకుంటోన్న గంజాయి మాఫియా

వ్యాపార విస్తరణకు గంజాయి మాఫియా విద్యార్థులను పావులుగా ఎంచుకుంటోంది. గంజాయి అలవాటున్న వారిని విక్రేతలుగానూ మార్చుతోంది. ఇతర రాష్ట్రాల నుంచి తెచ్చిన సరకుతో ఓ హోటల్‌లో కొందరు విద్యార్థులు దిగినట్లు సమాచారం అందుకున్న హైదరాబాద్‌ సైఫాబాద్ పోలీసులు దాడి చేశారు. ఐదుగురిని అదుపులోకి తీసుకున్నారు.

తమ వ్యాపార విస్తరణకు గంజాయి మాఫియా విద్యార్థులను పావులుగా మార్చుకుంటోంది. గంజాయి అలవాటున్న వారిని విక్రేతలుగా మారుస్తూ విద్యార్థులకు అమ్ముతున్నట్టు పోలీసుల విచారణలో తేలింది. హైదరాబాద్‌ ఖైరతాబాద్ మారుతీనగర్‌కు చెందిన కార్తీక్, ఎల్బీనగర్​లోని ఓ ప్రైవేటు కళాశాలలో డిగ్రీ మొదటి సంవత్సరం చదువుతుండగా... అదే బస్తీకి చెందిన వంశీవర్ధన్ ఇంటర్ రెండో సంవతర్సరం చదువుతున్నాడు. తుమ్మలబస్తీకి చెందిన మణికాంత్ ఘట్కేసర్‌లోని ఓ కళాశాలలో బీటెక్ రెండో సంవత్సరం.. చింతలబస్తీకి చెందిన ధరమ్ దాస్ న్యూ సీఐబీ క్యార్టర్స్‌కు చెందిన మరో విద్యార్థి ఇంటర్ చదువుతున్నారు.

కార్తీక్, వంశీవర్ధన్ కలిసి మిగతా ముగ్గురి నుంచి డబ్బు వసూలు చేసి ఈ నెల 25న ఓ కారులో విశాఖపట్టణం జిల్లా అరకు వెళ్లారు. నర్సింహ వద్ద గంజాయి కొనుగోలు చేశారు. లక్డీకాపూల్‌లోని ఓ హోటల్‌లో దిగారు. ఐదుగురు కలిసి హోటల్‌లోని గదిలో గంజాయిని చిన్న ప్యాకెట్లుగా కడుతున్నారు. ఇది తెలిసి సైఫాబాద్ పోలీసులు హోటల్‌పై దాడి చేసి.. నిందితుల నుంచి 2.7 కిలోల గంజాయి, రూ. ఐదు వేలు స్వాధీనం చేసుకున్నారు.

గంజాయి ప్యాకెట్లు కడుతూ దొరికిన విద్యార్థులు

చిన్న ప్యాకెట్లను కళాశాలల విద్యార్థులకు విక్రయించనున్నారని పోలీసుల విచారణలో తేలింది. కేసు నమోదు చేసుకున్న పోలీసులు నలుగురిని రిమాండ్‌కు తరలించి.. ఓ మైనార్ బాలుడిని జువైనల్ హోంకు తరలించారు.

ఇదీ చదవండి: ఓఆర్ఆర్​పై వెయ్యి కిలోల గంజాయి స్వాధీనం