చైనా బెట్టింగ్ యాప్ల కేసులో లోతుగా విచారణ చేపట్టేందుకు ఈడీ కసరత్తు చేస్తోంది. సుమారు వెయ్యి కోట్ల రూపాయలకు పైగా కుంభకోణం జరిగినట్లు ఈడీ అధికారులు అంచనా వేస్తున్నారు. ముగ్గురు కీలక నిందితులు యాన్ హో, ధీరజ్ సర్కార్‌, అంకిత్ కపూర్‌ని.... కోర్టు అనుమతితో 8 రోజులపాటు... కస్టడీలోకి తీసుకొని ప్రశ్నిస్తోంది. సుమారు వెయ్యి కోట్ల రూపాయలకు పైగా కుంభకోణం జరిగినట్లు అంచనా వేస్తోంది.
డమ్మీ డైరెక్టర్లతో దోచేశారు..
యాన్ హో, ధీరజ్ సర్కారు, అంకిత్ కపూర్లను ఈడీ అధికారులు చంచల్ గూడ జైలు నుంచి కస్టడీలోకి తీసుకున్నారు. హైదరాబాద్ సీసీఎస్లో నమోదైన కేసుల ఆధారంగా ఈడీ దర్యాప్తు చేస్తోంది. ఈ కామర్స్ పేరుతో చైనీయులు వందలాది బెట్టింగ్ యాప్లు నిర్వహించినట్లు ఈడీ గుర్తించింది. సీఏల సహకారంతో.. డమ్మీ డైరెక్టర్లతో భారత్లో వందల కంపెనీలు సృష్టించినట్లు దర్యాప్తులో గుర్తించారు. ఈ వెబ్సైట్లన్నీ అమెరికా నుంచి కొనసాగుతున్నట్లు దర్యాప్తు బృందాలు గుర్తించాయి. పేటీఎం తదితర మొబైల్ వాలెట్ల ద్వారా ఎక్కువగా లావాదేవీలు జరిపినట్టు ఈడీ దర్యాప్తులో వెల్లడైంది.
బ్యాంకు ఖాతాలు సీజ్
గత నెలలో దిల్లీ, గురుగ్రాం, ముంబయి, పుణేలోని 15 ప్రాంతాల్లో సోదాలు నిర్వహించిన ఈడీ.. కీలక ఆధారాలు సేకరించింది. నాలుగు హెచ్ఎస్బీసీ బ్యాంకు ఖాతాల్లో 47 కోట్ల రూపాయలు స్తంభింప చేసింది. సోదాల్లో 17 హార్డ్ డిస్క్లు, 5 ల్యాప్టాప్లు, ఫోన్లను స్వాధీనం చేసుకున్నారు. ఆన్లైన్ వాలెట్ సంస్థలు, హెచ్ఎస్బీసీ, ఆర్వోసీల నుంచి ఈడీ సమాచారం సేకరిస్తోంది. ఆన్లైన్ వాలెట్ సంస్థల ప్రమేయంపై కూడా ఆరా తీస్తోంది. మరోవైపు ఈ మోసంలో ఇంకా ఎవరెవరికి సంబంధం ఉందో తెలుసుకునేందుకు కీలక నిందితులను ప్రశ్నిస్తోంది.
ఇదీ చూడండి: చోరీ కేసును ఛేదించిన పోలీసులు... 62 తులాల బంగారం స్వాధీనం
