పోలీసులు ఎన్నిరకాల చర్యలు చేపట్టినా అమాయకులకు వల వేసేందుకు సైబర్ నేరగాళ్లు రోజుకో పంథా అనుసరిస్తున్నారు. హైదరాబాద్ ఖైరతాబాద్కు చెందిన వెంకటేశ్వరరావు బ్యాంకు ఖాతా నుంచి రెండ్రోజుల్లో దాదాపు 5 లక్షల రూపాయలు మాయమయ్యాయి. ఈ మేరకు బాధితుడు సైబర్ క్రైమ్ పోలీసులకు ఫిర్యాదు చేశాడు.
తన క్రెడిట్ కార్డు తన దగ్గరే ఉన్నా ఖాతాలో నుంచి 2.70 లక్షలు మాయమయ్యాయని సికింద్రాబాద్కు చెందిన హామీద్ తెలిపారు. క్రెడిట్ కార్డు ఉపయోగించకున్నా తన ఖాతా నుంచి డబ్బు మాయమైందని హమీద్ సైబర్ క్రైమ్ పోలీసులను ఆశ్రయించాడు.
బంజారాహిల్స్కు చెందిన డాక్టర్ ప్రమోద్ జోషికి తన ఛైర్మన్ నుంచి ఈ-మెయిల్ వచ్చింది. అత్యవసరంగా 1.50లక్షలు అవసరమని... వెంటనే పంపించాలని అందులో ఉంది. వెంటనే ఈ-మెయిల్ లో ఉన్న బ్యాంక్ ఖాతాకు ప్రమోద్ 1.50లక్షలు బదిలీ చేశారు. మరుసటి రోజు ఆసుపత్రికి వెళ్లినప్పుడు ఛైర్మన్ను కలిసి... డబ్బుల గురించి ప్రస్తావించారు. తాను మెయిల్ పంపించ లేదని ఛైర్మన్ చెప్పగా షాకైన ప్రమోద్ చేసేదేం లేక సైబర్ పోలీసులకు ఫిర్యాదు చేశారు. కేసు నమోదు చేసుకున్న పోలీసులు దర్యాప్తు ప్రారంభించారు.
