సైబర్ నేరగాళ్లు రోజురోజుకూ కొత్త పద్ధతుల్లో రెచ్చిపోతున్నారు. లక్కీ డ్రాల పేరుతో ఎంతోచాకచక్యంగా డబ్బులు దోచేస్తున్నారు. సికింద్రాబాద్ ప్రాంతానికి చెందిన ఓ మహిళ తరచుగా షాప్క్లూస్ సైట్, యాప్ల నుంచి వస్తువులు కొనుగోలు చేస్తుంటారు. ఇటీవల నిర్వహించిన లక్కీ డ్రాలో ఆమెకు కారు వచ్చిందంటూ ఫోన్ వచ్చింది. కారు కావాలా? లేక దాని విలువను నగదు తీసుకుంటారా? అంటూ ప్రశ్నించారు. తనకు నగదే కావాలంటూ బాధితురాలు తెలిపగా.. ఆ ప్రాసెస్ మొదలుపెట్టడానికి కొన్ని ఫీజులు చెల్లించాలని చెప్పారు. రిజిస్ట్రేషన్ ఫీ, జీఎస్టీ మినహా మిగిలిన అన్ని పన్నులు రిఫండ్ అవుతాయని నమ్మబలికారు. ఇలా ఆమె నుంచి రూ.5.7 లక్షలు కాజేసి మోసం చేశారు.
మరోపక్క రుణం ఇప్పిస్తామంటూ ఫోన్ చేసిన సైబర్ నేరగాళ్లు నగరానికి చెందిన ఓ వ్యక్తిని నమ్మించారు. అతను ఆసక్తి చూపగా ప్రాసెసింగ్ సహా ఇతర ఛార్జీల పేరుతో రూ.80 వేలు కాజేశారు. నగరానికి చెందిన మరో వ్యక్తికి ఫోన్ చేసిన సైబర్ నేరగాళ్లు క్రెడిట్ కార్డు, కేవైసీ అప్డేట్ చేయాలని చెప్పారు. వీటి పేరుతో అతన్నుంచి కార్డు వివరాలు, ఓటీపీ వివరాలు తీసుకుని రూ.80 వేలు స్వాహా చేశారు. వీరి ఫిర్యాదుల మేరకు హైదరాబాద్ సీసీఎస్ పోలీసులు కేసు నమోదు చేసుకుని దర్యాప్తు చేస్తున్నారు.
ఇదీ చదవండిః బ్యాంక్ ఖాతాను అప్డేట్ చేస్తామని చెప్పి దోచేశారు
