కుక్కల గోల భరించలేకపోతున్నామంటూ హైదరాబాద్ నాచారం పోలీస్స్టేషన్ పరిధిలోని సాయిదర్శన్ ఆపార్ట్మెంట్లో నివసిస్తున్న గీతిక దత్త అనే మహిళపై ఫిర్యాదు ఇచ్చారు అపార్ట్మెంట్వాసులు. గీతిక గత 16 సంవత్సరాలుగా కుక్కలను పెంచుకుంటోంది. అయితే ఆమె పెంచుకుంటున్న 20 కుక్కల వల్ల తమకు ఇబ్బంది కలుగుతోందంటూ అపార్ట్మెంట్ వాసులు ఫిర్యాదు చేశారు. కుక్కలు చేస్తున్న మలవిసర్జన వల్ల దుర్వాసన ఎక్కువైపోతోందని.. రాత్రి పూట వాటి అరుపులతో సరిగా నిద్రపోలేకపోతున్నామని వాపోతున్నారు.
వారం రోజుల క్రితం 6 కుక్కలను ఎంసీహెచ్ డాగ్ స్క్వాడ్ వారు తీసుకెళ్లారని.. అయితే వాటిని మళ్లీ తీసుకువచ్చారని అపార్ట్మెంట్ వాసులు పేర్కొన్నారు. కుక్కలను ఎట్టి పరిస్థితుల్లో అపార్ట్మెంట్లోకి రానివ్వమని అందరూ కలిసి భీష్మించుకు కూర్చున్నారు. ఈ కుక్కల బెడద నుంచి తమను కాపాడాలని స్థానికులు కోరుతున్నారు.
