కనిపించకుండా వెళ్లింది.. తిరుపతిలో పెళ్లి చేసుకుంది..!

రెండు రోజుల క్రితం ఆదృశ్యమైన కీర్తి ప్రజ్ఞ అనే యువతి ఆచూకీ దొరికింది. ఇంట్లో నుంచి వెళ్లిపోయిన సదరు యువతి.. తిరుపతిలో ఓ వ్యక్తిని పెళ్లి చేసుకున్నట్లు పోలీసులు కనుగొన్నారు.

ఇంట్లో నుంచి అదృశ్యమైన కీర్తి ప్రజ్ఞ అనే యువతి తిరుపతిలో వివాహం చేసుకున్న సంఘటన సికింద్రాబాద్ లాలాగూడ పోలీస్ స్టేషన్ పరిధిలో చోటు చేసుకుంది. లాలాపేట ప్రాంతానికి చెందిన శ్రీధర్ అనే వ్యక్తి స్టేషనరీ షాప్ నడపడంతో పాటు యోగా శిక్షకుడు. శ్రీధర్ కుమార్తె కీర్తి ప్రజ్ఞ స్థానికంగా ఉండే కళాశాలలో డిగ్రీ చివరి సంవత్సరం చదువుతోంది.

శిక్షణలో పరిచయమైన వ్యక్తితోనే..

ఇటీవల శ్రీధర్ కుటుంబం యోగ శిక్షణ నిమిత్తం ఉత్తరాఖండ్​లోని నైనిటాల్ ప్రాంతానికి వెళ్లింది. యోగా శిక్షణ నేర్చుకుంటున్న క్రమంలో.. కీర్తి ప్రజ్ఞకు అదే యోగా క్యాంప్​లో తిరుపతికి చెందిన ప్రభాకర్ అనే వ్యక్తితో పరిచయం ఏర్పడింది. ఆ పరిచయంతోనే ప్రభాకర్​ని పెళ్లి చేసుకున్నట్లు పోలీసులు పేర్కొన్నారు.

ఎవరికీ చెప్పకుండా...

ఈ నెల 3వ తేదీన ఉదయం 6 గంటల సమయంలో కీర్తి ప్రజ్ఞ ఇంట్లో ఎవరికీ చెప్పకుండా బయటకు వెళ్లిపోయింది. దుస్తులు, ఆమె వ్యక్తిగత గుర్తింపు కార్డులను తీసుకుని ఆమె ఇంటి నుంచి వెళ్లిపోయినట్లు కుటుంబసభ్యులు పోలీసులకు ఫిర్యాదు చేయటంతో.. పోలీసులు ఆమె కోసం గాలింపు చర్యలు చేపట్టారు. చివరకు ఆమె తిరుపతిలో వివాహం చేసుకున్నట్లు తెలిసింది. పోలీసులు యువతి కుటుంబ సభ్యులకు సమాచారం అందించారు.

ఇదీ చూడండి: అదృశ్యమైందనుకున్నారు.. తిరిగొస్తే షాకయ్యారు..!