15 నిమిషాల్లో మనం ఎన్ని దేశాల పేర్లను చెప్పగలం.. మహా అంటే 10 లేదా 20.. మరి వాటి రాజధానుల పేర్లు! కరెన్సీ వివరాలు! అమ్మో కష్టమే అంటారా? కానీ దుబాయ్లో నివసించే భారత సంతతి చిన్నారి 'సారా చిప్పా' మాత్రం ఏకంగా 195 దేశాలు-రాజధానులు-కరెన్సీల పేర్లను అలవోకగా చెప్పేస్తూ వావ్ అనిపిస్తోంది. ఇంతకుముందు వరకు ఈ రికార్డు.. దేశాలు, రాజధానులను గుర్తుపెట్టుకోవడంపైనే ఉండగా.. కొత్తగా కరెన్సీ పేర్లను సైతం చెప్పి సరికొత్త రికార్డును ఆవిష్కరించింది సారా. అంతేగాక ఈ విభాగంలో ప్రపంచ రికార్డు సాధించిన మొట్టమొదటి వ్యక్తి సారానే కావడం విశేషం. మే 2న యూఏఈలో జరిగిన ఓ వర్చువల్ లైవ్ ఈవెంట్లో ఆమె ఈ ఫీట్ సాధించింది.
585 అంశాలు..
ఈ రికార్డు సాధనలో సింగపూర్‌కు చెందిన 'బ్రెయిన్ రైమ్ కాగ్నిటివ్ సొల్యూషన్స్' వ్యవస్థాపకుడు సుశాంత్ మిజోరేకర్ సారాకు శిక్షణ, సహాకారం అందించారు. జ్ఞాపకశక్తికి సంబంధించి.. సృజనాత్మక నైపుణ్యాలు, ఇంటెలిజెన్స్ టెక్నిక్‌ల ద్వారా ఎక్కువ పేర్లను గుర్తుంచుకునేలా శిక్షణ ఇచ్చారు. మొదట్లో 585 అంశాలను ప్రాక్టీస్ చేయడానికి సారాకు సుమారు 90నిమిషాలు పట్టేది. అయితే నిరంతర శిక్షణతో ఇప్పుడు కేవలం 15 నిమిషాల్లోనే చెప్పగలుగుతోంది.
లాకౌడౌన్ సమయంలో సారా 'మెమరీ టెక్నిక్స్' తరగతులకు హాజరైందని.. ప్రపంచ రికార్డ్ సాధించేందుకు ముందస్తు ప్రణాళికలేవీ చేసుకోలేదని ఆమె తండ్రి వివరించారు.
తల్లిదండ్రుల వల్లే..
సారాకు ఏడాది వయసున్నప్పుడే రాజస్థాన్‌లోని భీల్వాడాకు చెందిన ఆమె తల్లిదండ్రులు ఉద్యోగరీత్యా దుబాయ్లో స్థిరపడ్డారు. ఆమె తండ్రి సునీల్ చిప్పా టెలికాం కంపెనీలో పనిచేస్తుండగా.. తల్లి రేణు చిప్పా రియల్ ఎస్టేట్ సంస్థలో ఉద్యోగిని. 'షైన్ విత్ సారా' అనే యూట్యూబ్ ఛానల్లో 'ఇన్క్రెడిబుల్ ఇండియా' సిరీస్ను నడిపిస్తోన్న సారా.. తన చదువుతో పాటు.. అభ్యాసాలు కొనసాగించేందుకు మద్దతునిస్తోన్న తల్లిదండ్రులకే ఈ పేరు ప్రఖ్యాతులన్నీ దక్కుతాయని చెబుతోంది.
ఇవీ చదవండి: నాలుగేళ్ల చిన్నారి.. ప్రతిభకు సాటేది!
రెండేళ్లకే అద్భుత ప్రతిభ.. జ్ఞాపకశక్తితో ఔరా అనిపిస్తున్న బుడతడు
