ఇజ్రాయెల్ సార్వత్రిక ఎన్నికల నేపథ్యంలో ఆ దేశంలోని టెల్ అవిన్ నగరంలో భారత ప్రధాని నరేంద్ర మోదీ చిత్రాలు దర్శనమిచ్చాయి. ఆ దేశ ప్రధానమంత్రి బెంజిమెన్ నెతెన్యాహూకు చెందిన లికుడ్ పార్టీ తన ప్రచారంలో మోదీతో పాటు అమెరికా, రష్యా అధ్యక్షులు ట్రంప్, పుతిన్ల చిత్రాలను ఉపయోగిస్తోంది. ఈ ముగ్గురి నేతలతో నెతెన్యాహూ దిగిన ఫోటోలతో భారీ బ్యానర్లను టెల్ అవిన్ నగరంలో ఉన్న పార్టీ ప్రధాన కార్యాలయంపై ప్రదర్శించింది.
ప్రపంచదేశాలకు చెందిన అగ్రనేతలతో నెతెన్యాహూకున్న సాన్నిహిత్యాన్ని ఎన్నికల అస్త్రంగా ఉపయోగించుకుంటోంది లికుడ్ పార్టీ. ఈ సాన్నిహిత్యం దేశ భద్రతకు ఎంతో ముఖ్యమని తెలియజేయడానికే ఈ విధంగా ప్రచారం చేస్తోంది. ఇజ్రాయెల్ రాజకీయాల్లో ఆయనది తిరుగులేని స్థాయి అన్న భావనను ఓటర్లలో కలిగించేందుకు ప్రయత్నిస్తోంది.
సెప్టెంబర్ 9న భారత పర్యటనకు...
ఇజ్రాయెల్లో సెప్టెంబర్ 17న ఎన్నికలు జరుగనున్నాయి. అదే నెల 9న మోదీతో భేటీకి నెతెన్యాహూ భారత్ రానున్నారు. ఈ పర్యటన ఆయన ప్రచారానికి ఉపకరిస్తుందని విశ్లేషకులు చెబుతున్నారు.
ఇజ్రాయెల్ను సూదీర్ఘకాలం పాలించిన నేతగా చరిత్ర సృష్టించారు నెతెన్యాహూ. కానీ తాజా ఒపీనియన్ పోల్స్లో లికుడ్ పార్టీపై ప్రజాదరణ తగ్గిపోయిందని తేలింది. ఈ నేపథ్యంలో ప్రస్తుతం రాజకీయ సవాళ్లతో సతమతమవుతున్నారు ఆ దేశ ప్రధాని.
మద్దతు కూడగట్టలేక...
ఏప్రిల్ నెలలో జరిగిన ఎన్నికల్లో లికుడ్ పార్టీ అత్యధిక స్థానాలు సాధించినప్పటికీ.. ప్రభుత్వ ఏర్పాటుకు ఇతర పార్టీల మద్దతు కూడగట్టడంలో విఫలమైంది. బల నిరూపణలో 45-75 ఓట్ల తేడాతో 21వ నెస్సెట్ (పార్లమెంట్) రద్దయింది. ఈ నేపథ్యంలో సెప్టెంబర్ 17న ఎన్నికల నిర్వహిస్తున్నారు.
ఇదీ చూడండి: అఫ్గాన్ ఉపాధ్యక్ష అభ్యర్థి లక్ష్యంగా బాంబు దాడి
