ఇరాన్​కు చిక్కిన మరో విదేశీ ట్యాంకర్

అక్రమంగా చమురు రవాణా చేస్తున్న మరో విదేశీ ఓడను ఇరాన్​ స్వాధీనం చేసుకుంది. నెల రోజుల వ్యవధిలో ఆ దేశం విదేశీ ట్యాంకర్లను స్వాధీనం చేసుకోవడం ఇది మూడోసారి. తాజాగా అదుపులోకి తీసుకున్న ఓడలో 7 లక్షల లీటర్ల అక్రమ చమురు ఉన్నట్లు తెలుస్తోంది.

గల్ఫ్​లో ఓ విదేశీ ట్యాంకర్​ను ఇరాన్ స్వాధీనం చేసుకుంది. అక్రమంగా చమురు రవాణా చేస్తుందనే ఆరోపణలతో ఈ ట్యాంకర్​ను అదుపులోకి తీసుకుంది. విదేశీ ట్యాంకర్లను ఇరాన్​ స్వాధీనం చేసుకోవడం ఈ నెలలో ఇది మూడో సారి. వరుస పరిణామాల నడుమ ఇరాన్, అమెరికా మధ్య మరోసారి ఆందోళనకర పరిస్థితులు నెలకొన్నాయి.

ఫార్సీ ఐలాండ్​ సమీపంలో తాజాగా ఈ ట్యాంకర్​ను ఇస్లామిక్ రెవల్యూషనరీ గార్డులు పట్టుకున్నట్లు స్థానిక అధికారిక మీడియా ప్రకటించింది. స్వాధీనం చేసుకున్న ఆ ట్యాంక్​ ద్వారా 7 లక్షల లీటర్ల అక్రమ చమురు తరలిస్తున్నట్లు పేర్కొంది. అందులో ఉన్న ఏడుగురు సిబ్బందిని వారు అదుపులోకి తీసుకున్నట్లు తెలిపింది.

ఇదీ చూడండి: ఇరాన్ అదుపులోకి ట్యాంకర్ల పూర్తి విరాలు