ప్రపంచ దేశాలను కరోనా వైరస్ తీవ్ర ఇబ్బందులకు గురి చేస్తోంది. వైరస్ కేంద్రబిందువైన చైనాలో మృతుల సంఖ్య తగ్గుతుండగా.. ఇతర దేశాల్లో గణనీయంగా పెరుగుతోంది. ముఖ్యంగా ఇరాన్లో వైరస్ బారిన పడి ప్రాణాలు కోల్పోతున్న వారి సంఖ్య ఆందోళనకరంగా ఉంది. ఆ దేశవ్యాప్తంగా ఇప్పటి వరకు 77మంది మరణించారు.
ఇరాన్లో 23మంది చట్టసభ్యులకు కుడా కరోనా సోకడం ఆందోళన కలిగించే అంశం. అనేకమంది చట్టసభ్యులు వీరికి దూరంగా ఉంటున్నారు. ఈ పరిణామాలతో సైన్యాన్ని అప్రమత్తం చేశారు ఇరాన్ సుప్రీమ్ నేత అయాతుల్లాహ్ అలీ ఖామేనేయీ. అవసరమైనప్పుడు ఆరోగ్యశాఖ అధికారులకు సహాయం చేయాలని ఆదేశాలు జారీ చేశారు. మొత్తం 3లక్షల మంది సైనికులతో కరోనాపై యుద్ధానికి సిద్ధంగా ఉన్నట్టు ప్రకటించారు.
దేశాల సంఖ్య...
మరోవైపు కరోనా బారినపడుతున్న దేశాల సంఖ్య గణనీయంగా పెరుగుతోంది. ఈ జాబితాలోకి తాజాగా ఉక్రెయిన్ చేరింది. 70దేశాలకుపైగా వ్యాపించిన ఈ వైరస్... ఇప్పటి వరకు దాదాపు 3వేల 100మందిని బలితీసుకుంది. మరో 90వేల మందికి వైరస్ సోకింది.
ఇటలీలోనూ ఇదే పరిస్థితి. తాజాగా పోప్ ఫ్రాన్సిస్కు జలుబు చేయడం, దగ్గు రావడం వల్ల అక్కడి ప్రజలు భయాందోళనలకు గురయ్యారు. పరీక్షల్లో వైరస్ లక్షణాలు కనపడకపోవడం వల్ల అందరూ ఊపిరి పీల్చుకున్నారు.
అమెరికా అప్రమత్తం...
అమెరికా రాజధాని వాషింగ్టన్లోని హోంల్యాండ్ సెక్యూరిటీ కార్యాలయం మూతపడింది. ఓ ఉద్యోగికి వైరస్ సోకిందనే అనుమానంతో అధికారులు ఈ నిర్ణయం తీసుకోక తప్పలేదు. రెండు వారాల వరకు కార్యలయాన్ని మూసివేయనున్నట్టు స్పష్టం చేశారు.
ఇంటి నుంచే పని...
వైరస్ నేపథ్యంలో సామాజిక మాధ్యమ దిగ్గజం ట్విట్టర్ అప్రమత్తమైంది. ముందు జాగ్రత్త చర్యల్లో భాగంగా.. ప్రపంచవ్యాప్తంగా ఉన్న తమ ఉద్యోగులను ఇంటి నుంచే పని చేయమని కోరింది.
ఇదీ చూడండి:- 'కరోనా దెబ్బకు దిక్కుతోచని స్థితిలో ప్రపంచం'
