ఇరాన్ గల్ఫ్ ఆఫ్ ఒమన్ ప్రాంతంలో ప్రమాదవశాత్తు జరిగిన క్షిపణి పేలుడులో 19 మంది నావికులు మరణించారు. ఈ ఘటనలో మరో 15 మంది తీవ్రంగా గాయపడ్డారు.
ఆదివారం జరిగిన ఈ ఘటనలో తొలుత ఒక్కరే మరణించినట్లు అధికారులు తెలిపారు. అయితే మరణాల సంఖ్య 19కి చేరినట్లు తాజాగా ప్రకటించారు.
మీడియా కథనం
టెహ్రాన్కు ఆగ్నేయాన 1,270 కిలోమీటర్ల దూరంలో ఉన్న పోర్ట్ ఆఫ్ జాస్క్లో ఈ ప్రమాదం జరిగింది. శిక్షణ సమయంలో జరిగిన ఈ ఘటనలో లక్ష్యానికి సమీపంలో ఉన్న 'కొనరక్' సహాయక నౌకను క్షిపణి ఢీకొట్టినట్లు స్థానిక మీడియా వెల్లడించింది. లక్ష్యానికి దగ్గరగా ఉండటం వల్లే కొనరక్ నౌకపై ప్రమాదవశాత్తుగా ఈ దాడి జరిగినట్లు పేర్కొంది.
అమెరికా నో కామెంట్
వ్యూహాత్మకంగా కీలకమైన హర్మూజ్ జలసంధికి దగ్గర్లో ఉన్న ఈ ప్రాంతంలో ఇరాన్ తరచుగా సైనిక విన్యాసాలు నిర్వహిస్తూ ఉంటుంది. ప్రపంచ చమురు రవాణాలో 20 శాతం ఈ మార్గం నుంచే వెళ్తుంది.
ఈ కారణంగానే అమెరికా నేవీకి చెందిన ఐదవ నౌకాదళం ఈ ప్రాంతాన్ని ఎప్పటికప్పుడు పర్యవేక్షిస్తూ ఉంటుంది. ఇరు దేశాల మధ్య తీవ్ర ఉద్రిక్తతల నేపథ్యంలో తాజా ఘటన జరగడం గమనార్హం. అయితే ఈ ఘటనపై అగ్రరాజ్యం ఇప్పటివరకు స్పందించలేదు.
నౌక కథాకమామీషు..
ఇరాన్ మీడియా కథనాల ప్రకారం కొనరక్ నౌకకు 2018లో మరమ్మత్తులు చేసి క్షిపణి ప్రయోగాల కోసం తీర్చిదిద్దినట్లు తెలుస్తోంది. ఈ నౌకకు సముద్ర క్షిపణులు, యాంటీ షిప్ మిస్సైల్స్ ప్రయోగించే సామర్థ్యం ఉన్నట్లు స్థానిక మీడియా పేర్కొంది. 47 మీటర్ల ఈ నౌక 1988 నుంచి నేవీలో సేవలందిస్తోంది. 40 టన్నుల బరువు సహా 20 మంది నావికులను మోసుకెళ్లగలదు.
