కరోనా వైరస్తో ఇరాన్ తీవ్ర ఇబ్బందులు ఎదుర్కొంటోంది. గడిచిన 24 గంటల్లో వైరస్ వల్ల 63మంది ప్రాణాలు కోల్పోయారు. దీనితో మృతుల సంఖ్య 354కు చేరింది. ఇంత మొత్తంలో మరణాలు సంభవించడం ఇరాన్లో ఇదే తొలిసారి.
"తాజా నివేదికల ప్రకారం 958మందికి వైరస్ నిర్ధరణ అయ్యింది. దీనితో మొత్తం కేసుల సంఖ్య 9వేలకు చేరింది. గడిచిన 24గంటల్లో 63మంది మరణించారు. దేశంలో ఇప్పటి వరకు 354మంది ప్రాణాలు కోల్పోయారు."
--- ఇరాన్ ఆరోగ్యశాఖ.
అధికారికంగా దేశంలో ఇంకా ఎలాంటి నిర్బంధం విధించలేదు ఇరాన్ ప్రభుత్వం. అయితే ఇతర ప్రాంతాల్లో పర్యటించవద్దని ప్రజలకు సూచించింది. వైరస్ భయంతో ఆ దేశంలోని పాఠశాలలు, విశ్వవిద్యాలయాలు మూతపడ్డాయి.
ఇటలీలో భారీ ప్యాకేజీ...
వైరస్ కేంద్రబిందువైన చైనా అనంతరం.. ఇటలీలోనే కరోనా ప్రభావం అధికంగా ఉంది. ఇప్పటికే ఆ దేశంలో 631మంది వైరస్తో మరణించారు. మరో 10వేలకుపైగా మంది కరోనా బారిన పడ్డారు. ఈ నేపథ్యంలో మహమ్మారిపై పోరుకు 25 బిలియన్ డాలర్ల( సుమారు రూ. 2 లక్ష కోట్లు)ను ఖర్చు చేసే విధంగా ప్రణాళికను రచించింది ఇటలీ ప్రభుత్వం. ఈ మొత్తంలోని సగం.. తక్షణమే వినియోగించనున్నట్టు ఇటలీ ఆర్థికమంత్రి రొబెర్టో గౌల్టియరి తెలిపారు. మిగిలిన వనరులను అత్యవసర పరిస్థితుల కోసం కేటాయించినట్టు స్పష్టం చేశారు.
ఇదీ చూడండి:- కరోనాను గుర్తించేందుకు ఆ 5 రోజులు చాలు!
