లాటరీ ద్వారా పలువురు భారీ మొత్తాన్ని సొంతం చేసుకున్న సంఘటనల గురించి వింటుంటాం. కానీ ఇక్కడ ఓ ఉద్యోగికి కంపెనీనే జాక్పాట్ ఇచ్చినట్లు అయింది. ఇది పొరపాటుగా జరిగినా అతనికి మాత్రం లైఫ్టైం సెటిల్మెంట్ అయింది. అతనికి ఎప్పుడు వచ్చే జీతం కంటే 330 రెట్లు ఎక్కువ మొత్తం ఖాతాలో పడింది. దొరికిందే అవకాశమని భావించిన ఆ ఉద్యోగి.. సంస్థకు రిజైన్ చేసి పరారయ్యాడు. ఈ ఘటన దక్షిణ అమెరికాలోని చిలీ దేశంలో జరిగింది. ఇంతకీ అతని జీతం ఎంతో తెలుసా? 5,00,000 చిలియన్ పెసోస్ (రూ.43,028).. అయితే అతనికి వచ్చిన మొత్తం మాత్రం 165,398,851 చిలియన్ పెసోస్ (రూ.1.42 కోట్లు).
స్థానిక మీడియా ప్రకారం.. మాంసాహార ఉత్పత్తి సంస్థ సీఐఏఎల్ అలిమెంటోస్ చెందిన ఆ ఉద్యోగికి మే 30న ఈ భారీ మొత్తంలో జీతం పడింది. అది గమనించిన ఆ ఉద్యోగి.. ఈ విషయాన్ని తన డిప్యూటీ మేనేజర్తో చెప్పాడు. అలా యాజమాన్యానికి ఈ విషయం తెలిసింది. ఉద్యోగిని సంప్రదించిన సంస్థ యాజమాన్యం.. బ్యాంకుకు వెళ్లి ఆ డబ్బును మళ్లీ రిటర్న్ చేయాల్సిందిగా కోరింది. అందుకు ఆ ఉద్యోగి కూడా సరే అన్నాడు. కానీ ఇంత నిజాయతీ పనికిరాదు అనుకున్నాడో ఏమో.. మరుసటి రోజు నుంచి మూడు రోజుల పాటు యాజమాన్యానికి స్పందించడం మాననేశాడు. ఆ తర్వాత రోజు తన లాయర్ ద్వారా రాజీనామా లేఖను అందించి పరారయ్యాడు. అప్పటి నుంచి ఆ ఉద్యోగి ఆచూకీ లేదని స్థానిక మీడియా వెల్లడించింది. మరోవైపు ఉద్యోగిపై యాజమాన్యం పోలీసులకు ఫిర్యాదు చేసింది.
ఇదీ చూడండి : 'వచ్చే పదేళ్లలో కోటి మందికి బాల్యవివాహాలు.. అదే కారణం!'
