విదేశీ కానుకల దుర్వినియోగం కేసులో పాక్ మాజీ ప్రధాని తెహ్రీక్‌-ఎ-ఇన్సాఫ్‌ పార్టీ అధినేత ఇమ్రాన్‌ఖాన్‌ను అరెస్ట్ చేయకుండానే పాక్ పోలీసులు వెనుదిరిగారు. దాదాపు 18 గంటల పాటు ఇమ్రాన్ నివాసం ఉన్న లాహోర్‌లోని జమాన్ పార్క్ ప్రాంతం రణరంగాన్ని తలపించింది. విదేశీ కానుకల కేసులో కోర్టు ఆదేశాల మేరకు ఇమ్రాన్‌ను అరెస్ట్ చేసేందుకు వచ్చిన పోలీసులను ఆయన మద్దతుదారులు అడ్డుకున్నారు. వారిపైకి రాళ్లు రువ్వారు. ఆందోళనకారులను చెదరగొట్టేందుకు పోలీసులు బాష్పవాయు గోళాలతోపాటు జల ఫిరంగులు ప్రయోగించారు. రబ్బరు బుల్లెట్లతో కాల్పులు జరిపారు. అయినా ఇమ్రాన్ మద్దతుదారులు మరింత రెచ్చిపోయారు. పోలీసులకు మద్దతుగా పాక్ ప్రభుత్వం రేంజర్లను పంపింది. ఇమ్రాన్ నివాసానికి పోలీసులు చేరుకోకుండా ఆయన మద్దతుదారులు రోడ్లపై టైర్లు కాల్చటమే కాకుండా వాహనాలకు నిప్పుపెట్టారు.
మంగళవారం మధ్యాహ్నం నుంచి బుధవారం ఉదయం వరకు జరిగిన ఘర్షణలో 62 మంది గాయపడ్డారు. వారిలో 54 మంది పోలీసులు కాగా.. 8 మంది పౌరులు ఉన్నట్లు జియో న్యూస్ తెలిపింది. గాయపడినవారిని ఆస్పత్రికి తరలించిన పోలీసులు.. దాడులకు బాధ్యులైన పీటీఐ కార్యకర్తలను పదులసంఖ్యలో అదుపులోకి తీసుకున్నారు. ఇమ్రాన్ మద్దతుదారులు రాత్రంతా పోలీసులు, రేంజర్లతో ఘర్షణపడ్డారు. విదేశీ కానుకల కేసులో జారీ అయిన అరెస్ట్ వారెంట్‌ను సవాల్‌ చేస్తూ పీటీఐ శ్రేణులు మంగళవారం లాహోర్‌ హైకోర్టును ఆశ్రయించగా.. బుధవారం విచారణ చేపట్టిన న్యాయస్థానం తీర్పు వాయిదా వేసింది. ఇమ్రాన్ నివాసం వెలుపల గురువారం వరకు పోలీసు ఆపరేషన్‌ నిలిపివేయాలని ఆదేశించింది. ఈ నేపథ్యంలో పాక్ రేంజర్లు, పోలీసులు వెనుతిరగటం వల్ల పీటీఐ శ్రేణులు సంబరాలు చేసుకున్నాయి.
జమాన్ పార్క్ ప్రాంతం నుంచి పాక్ రేంజర్లు, పోలీసులు వెనుదిరిగిన తర్వాత గ్యాస్‌ మాస్క్‌ ధరించిన ఇమ్రాన్‌ఖాన్‌ తన నివాసం నుంచి బయటికి వచ్చి పార్టీ శ్రేణులను కలిశారు. జైలుకు వెళ్లేందుకు బ్యాగ్‌ సర్దుకున్నప్పటికీ.. పోలీసు కస్టడీలో తన ప్రాణానికి ముప్పు ఉందని భావించిన పార్టీ కార్యకర్తలు.. పోలీసులకు లొంగిపోవటానికి తనను అనుమతించలేదన్నారు. అందువల్లనే పార్టీ కార్యకర్తలు.. పాక్ రేంజర్లు, పోలీసులను గట్టిగా ప్రతిఘటించినట్లు ఇమ్రాన్ తెలిపారు. పాకిస్థాన్‌లో ఓ రాజకీయ నేతపై ఇంత క్రూరమైన పోలీసు దాడిని తాను ఎప్పుడు చూడలేదని మండిపడ్డారు. విదేశీ కానుకల కేసును తగినంత భద్రత ఉండే కోర్టుకు బదిలీ చేయాలని కోరితే అరెస్ట్ వారంట్‌ జారీ చేశారని ఇమ్రాన్ ఆరోపించారు. ఒక మాజీ ప్రధానికి భద్రత నిరాకరించటం, ఆపై పోలీసులు దాడి చేయటాన్ని ఊహించలేదన్నారు. అరెస్ట్ అనేది కేవలం నాటకం మాత్రమేనని, తనను అపహరించి, హత్యచేయటం ప్రభుత్వ ఉద్దేశమని ఇమ్రాన్‌ఖాన్‌ ఆరోపించారు. మరోవైపు.. విదేశీ ఆటగాళ్లు పాల్గొంటున్న పాకిస్థాన్ సూపర్‌ లీగ్ ముగిసే వరకు పోలీసులు ఇమ్రాన్‌ఖాన్‌ నివాసానికి చేరుకునే అవకాశం లేదని జియో న్యూస్ పేర్కొంది.
ఇవీ చదవండి : పాక్ మాజీ ప్రధాని ఇమ్రాన్ ఖాన్ అరెస్ట్ ఖాయం!
పార్క్లో అలా దొరికిపోయిన రిషి సునాక్.. వెంటనే స్పందించిన అక్షతామూర్తి!
