Russia Ukraine news: రష్యా ఉక్రెయిన్ యుద్ధంలో కీలక పరిణామాలు చోటుచేసుకుంటున్నాయి. ఉక్రెయిన్పై రష్యా ప్రయోగించిన క్షిపణి.. నాటో సభ్య దేశమైన పోలండ్లో పడిన ఘటన తీవ్రమైన అంశంగా మారింది. ఈ క్షిపణి రష్యాదేనా, కాదా అనే విషయంపై అనేక అనుమానాలు తలెత్తుతున్నాయి. ఈ నేపథ్యంలో జీ7, నాటో దేశాల నేతలు అత్యవసరంగా సమావేశమయ్యారు.
అసలేమైందంటే?
Russia attack Poland: మంగళవారం ఉక్రెయిన్పై అనేక క్షిపణులతో విరుచుకుపడింది రష్యా. ఉక్రెయిన్ అధ్యక్షుడు జెలెన్స్కీ జీ20 సదస్సులో ప్రసంగిస్తుండగా పదుల సంఖ్యలో క్షిపణులు ఉక్రెయిన్ను తాకాయి. ఈ క్రమంలోనే ఓ క్షిపణి పోలండ్ సరిహద్దులోని ఓ గ్రామంలో పడింది. ఈ ఘటనలో ఇద్దరు ప్రాణాలు కోల్పోయారు. ఇది రష్యా క్షిపణేనని వార్తలు వచ్చాయి. తొలుత అమెరికా రక్షణ వర్గాలు సైతం ఇది రష్యా పనేనని చెప్పాయి. ఒకవేళ నిజంగానే రష్యా ఈ క్షిపణి ప్రయోగించి ఉంటే తదుపరి పరిణామాలు ఎలా ఉంటాయోనని ఆందోళన మొదలైంది. పోలండ్కు నాటో సభ్యత్వం ఉంది కాబట్టి.. కూటమిలోని దేశాలన్నీ పోలండ్కు రక్షణగా నిలవాల్సి ఉంటుంది. ఇదే జరిగితే యుద్ధం అనూహ్య మలుపు తిరిగేది.
రష్యాది కాకపోవచ్చు!
అయితే, పోలండ్లో పడిన క్షిపణి రష్యాది కాదని అమెరికా వివరణ ఇచ్చింది. జీ20 సదస్సులో ఉన్న అమెరికా అధ్యక్షుడు జో బైడెన్ సైతం.. మిస్సైల్ రష్యా ప్రయోగించి ఉండకపోవచ్చని పేర్కొన్నారు. 'ప్రాథమిక సమాచారం ఇందుకు(రష్యా ప్రయోగించిందనేందుకు) విరుద్ధంగా ఉంది. క్షిపణి గమనాన్ని చూస్తే ఇది రష్యా నుంచి ప్రయోగించినట్లు అనిపించడం లేదు. కానీ చూద్దాం. అసలేం జరిగిందో సరిగ్గా తెలుసుకునేందుకు ప్రయత్నిస్తాం. దర్యాప్తు తర్వాత ఏం చేయాలో సంయుక్తంగా నిర్ణయిస్తాం' అని బైడెన్ పేర్కొన్నారు. ఈ క్షిపణిని ఉక్రెయిన్ దళాలే ప్రయోగించి ఉండొచ్చని ప్రాథమిక అంచనాల్లో తేలిందని అమెరికా అధికారులు చెబుతున్నారు. విద్యుత్ మౌలిక సదుపాయాలపై రష్యా చేస్తున్న క్షిపణి దాడులను అడ్డుకునేందుకు ఉక్రెయిన్ దళాలు వీటిని ప్రయోగించి ఉండొచ్చని వివరణ ఇచ్చారు.
క్షిపణి.. మేడ్ ఇన్ రష్యా!
పోలండ్ ప్రభుత్వం మాత్రం తమ దేశంలో పడ్డ ఆయుధం రష్యాలో తయారైనదేనని పేర్కొంది. ఈ మేరకు ఘటనపై మాట్లాడిన పోలండ్ అధ్యక్షుడు ఆండ్రెజ్ డూడ.. ప్రస్తుతం అప్రమత్తంగా ఉండాలని సూచించారు. క్షిపణి ఘటనను 'దురదృష్టకరమైన ప్రమాదం' అని అభివర్ణించారు. 'ఇది పూర్తిగా భిన్నమైన పరిస్థితి. సమయోచితంగానే దీనిపై స్పందిస్తున్నాం. మా దేశంలో పడ్డ ఆయుధం రష్యాలో తయారైనదే. అది ఉక్రెయినే ప్రయోగించి ఉండొచ్చు' అని అధ్యక్షుడు ఆండ్రెజ్ స్పష్టం చేశారు. అయితే, ఇందుకు పూర్తి బాధ్యత మాత్రం రష్యాదేనని చెప్పారు. మంగళవారం పదుల సంఖ్యలో క్షిపణులను ఉక్రెయిన్పైకి రష్యా ప్రయోగించిన విషయాన్ని గుర్తు చేశారు.
రష్యా ఏమందంటే?
తొలుత ఈ పరిణామాన్ని విషాద ఘటనగా అభివర్ణించిన నాటో.. విశ్లేషణ అనంతరం కీలక ప్రకటన చేసింది. ఉద్దేశపూర్వకంగా ఈ ఘటన జరిగింది కాదని పేర్కొంది. కావాలనే దాడి చేసినట్లు ఎలాంటి ఆధారాలు లేవని నాటో చీఫ్ స్టోల్టెన్బర్గ్ తెలిపారు. మరోవైపు, ఈ దాడికి తమతో సంబంధం లేదని రష్యా స్పష్టం చేసింది. ఉక్రెయిన్-పోలండ్ సరిహద్దుల లక్ష్యంగా తాము ఎలాంటి దాడులకు పాల్పడలేదని రష్యా రక్షణ శాఖ పేర్కొంది.
ఉక్రెయిన్ ఇప్పటికీ.. సోవియట్ కాలం నాటి క్షిపణి రక్షణ వ్యవస్థలను ఉపయోగిస్తోంది. అప్పట్లో రష్యాలో తయారైన క్షిపణులను ఉక్రెయిన్ ప్రయోగించి ఉండొచ్చని విశ్లేషకులు భావిస్తున్నారు. ఈ పరిస్థితుల మధ్య పోలండ్కు బైడెన్ మద్దతుగా నిలిచారు. శక్తిమంతమైన జీ7, నాటో దేశాధినేతలతో అత్యవసర సమావేశానికి పిలుపునిచ్చారు. ఐరోపా కమిషన్ అధ్యక్షురాలు ఉర్సులా వాండర్ లెయెన్ సైతం ఈ ఘటనపై అప్రమత్తమయ్యారు. పోలండ్, ఉక్రెయిన్కు తమ మద్దతు ఉంటుందని స్పష్టం చేశారు. మరోవైపు, ఐరాస భద్రతా మండలి సైతం బుధవారం సమావేశం కానుంది. అయితే, ఇది ముందస్తుగా షెడ్యూల్ చేసిన కార్యక్రమమే.
