Sri lanka protests president: శ్రీలంక అధ్యక్షుడు గొటబాయ రాజపక్సకు దిమ్మతిరిగే ఝలక్ ఇచ్చారు ఇటీవలే ప్రధానిగా బాధ్యతలు చేపట్టిన రణిల్ విక్రమ్ సింఘే. గొటబాయ రాజీనామా చేయాలని నెలరోజులుగా ఆందోళనలు చేస్తున్న వారికి మద్దతు పలికారు. 'గొట గో హోమ్' నిరసనకారుల డిమాండ్లను పరిశీలించేందుకు కమిటీని ఏర్పాటు చేస్తున్నట్లు ప్రకటించారు. గ్రామాల్లోని యువ నిరసనకారులకు రక్షణ కల్పిస్తామని తెలిపారు. ఓ ఛానల్కు ఇచ్చిన ఇంటర్వ్యూలో ఈ వ్యాఖ్యలు చేశారు.
"దేశంలోని రాజకీయ వ్యవస్థను మార్చేందుకు 'గొట గో హోమ్' నిరసనలు కొనసాగాలి. అందుకు దేశంలోని యువత బాధ్యత తీసుకోవాలి. గ్రామాల్లో నిరసనలు చేస్తున్న యువతకు రక్షణ కల్పిస్తాం. భవిష్యత్తు విధాన రూపకల్పన కోసం వారి అభిప్రాయాలు తెలుసుకుంటాం."
- రణిల్ విక్రమ్ సింఘే, శ్రీలంక ప్రధాని.
ఆర్థిక సంక్షోభంలో కూరుకుపోయిన శ్రీలంకలో పెద్ద ఎత్తున నిరసనలు చేస్తున్నారు ప్రజలు. ఏప్రిల్ 9 నుంచి కొలంబోలోని గాలే ఫేస్ గ్రీన్లో గొటబాయకు వ్యతిరేకంగా ఆందోళనలు కొనసాగుతున్నాయి. 'గొట గో హోమ్' పేరుతో నిరసనలు చేస్తున్నారు. ఈ క్రమంలోనే మహింద రాజపక్సను ప్రధాని పదవి నుంచి తొలగించి.. యునైటెడ్ నేషనల్ పార్టీ నేత రణిల్ విక్రమ్ సింఘే(73)ను 26వ ప్రధానిగా నియమించారు అధ్యక్షుడు గొటబాయ రాజపక్స. అందుకు పార్లమెంట్లోని అన్ని పార్టీలు మద్దతు తెలిపాయి. దేశంలో జరుగుతున్న నిరసనల్లో తొమ్మిది మంది ప్రాణాలు కోల్పోయారు. 200 మందికిపైగా గాయపడ్డారు.
ఎల్టీటీఈ కుట్రపై దర్యాప్తు: దేశ భద్రతను బలోపేతం చేసేందుకు అన్ని చర్యలు తీసుకుంటున్నట్లు తెలిపింది శ్రీలంక ప్రభుత్వం. మే 18న నిషేధిత ఎల్టీటీఈ దాడులు జరిపేందుకు కుట్రలు రచిస్తోందన్న భారత మీడియా కథనాలపై దర్యాప్తు చేపడతామని పేర్కొంది. 2009లో శ్రీలంకలో తలెత్తిన అంతర్యుద్ధం ముగింపునకు గుర్తుగా మే 18న ముల్లివాయ్కల్ వార్షికోత్సం నిర్వహిస్తారు. 'మే 18న శ్రీలంకలో దాడులు చేసేందుకు ఎల్టీటీఈ ప్రణాళికలు రచిస్తోందని భారత నిఘా విభాగం గుర్తించినట్లు ద హిందూ వార్తాపత్రికలో మే 13న కథనం ప్రచురించింది. ఈ విషయంపై ఆరా తీయగా.. సాధారణ సమాచారంగా అందించినట్లు భారత నిఘా విభాగం తెలిపింది. ఈ విషయంలో దర్యాప్తు కొనసాగుతోందని, శ్రీలంకకు సమాచారం తెలియజేస్తామని పేర్కొంది.' అని ఓ ప్రకటన విడుదల చేసింది లంక.
ఇదీ చూడండి: లంక సంక్షోభానికి తాత్కాలిక తెర.. నూతన ప్రధానిగా రణిల్ విక్రమసింఘె
