Pakistan ISI: అమెరికా భద్రతా సంస్థల్లోకి చొరబడేందుకు పాకిస్థాన్ నిఘా విభాగం ఐఎస్ఐ విఫలయత్నం చేసింది. ఇందుకు సంబంధించి ఐఎస్ఐ ఏజెంట్లుగా పేర్కొంటున్న ఇద్దరిని అమెరికా దర్యాప్తు సంస్థ ఎఫ్బీఐ అరెస్ట్ చేసింది. నిందితులను అరియన్ తహేర్జాదే (40), హైదర్ అలీ (35)గా అధికారులు గుర్తించారు. అలీకి పాకిస్థాన్, ఇరాన్ నుంచి వివిధ దేశాలకు వీసాలు ఉన్నట్లు అధికారులు వెల్లడించారు.
అధికారులుగా నమ్మించి.. హోంశాఖకు చెందిన అధికారులుగా అందరినీ నమ్మించిన ఏజెంట్లు.. రక్షణ శాఖ వంటి కీలక విభాగాలకు చెందిన వారితో సంబంధాలు పెంచుకునేందుకు ప్రయత్నించారు. ఇందులో భాగంగా యునైటెడ్ స్టేట్స్ సీక్రెట్ సర్వీస్కు (యూఎస్ఎస్ఎస్) చెందిన పలువురితో పాటు హోంశాఖకు చెందిన ఓ అధికారికి కానుకలు ఇచ్చారు. అపార్ట్మెంట్లు, ఐఫోన్లు, టీవీ, డ్రోన్, అసాల్ట్ రైఫిల్ కేస్, జెనరేటర్ వంటి వస్తువులను బహూకరించారు. ఇందుకు అదనంగా అధ్యక్షుడు జో బైడెన్ సతీమణి జిల్ బైడెన్ భద్రతా బృందంలో ఒకరైన యూఎస్ఎస్ఎస్ ఏజెంట్కు 2000 డాలర్లు విలువ చేసే అసాల్ట్ రైఫిల్స్ను విక్రయించేందుకు ప్రయత్నించారు.
చుట్టూ నిఘా.. తాము నివసించే ప్రాంతంలో కూడా నిందితులు సీసీటీవీలను ఏర్పాటు చేశారు. వాషింగ్టన్లోని ఆ అపార్ట్మెంట్ కాంప్లెక్స్లోని వారికి తాము ఉన్నతాధికారులమని నమ్మించారు. నివాసితుల ఫోన్లను ఏ సమయంలోనైనా ఉపయోగించుకునే అధికారం తమకు ఉందని చెప్పుకొచ్చారు. దర్యాప్తులో భాగంగా త్వరలో దీనిని కుట్రగా కూడా పరిగణించే అవకాశం ఉందని అధికారులు వెల్లడించారు.
ఇదీ చూడండి : భారతీయులకు గుడ్ న్యూస్- బైడెన్ ఆమోదంతో ఇకపై..!
