Mexico City Shooting: మెక్సికోలో కాల్పులు కలకలం రేపాయి. మెక్సికో సిటీ తుల్టెపెక్ ప్రాంతంలోని ఓ ఇంటిలోకి దుండగులు చొరబడి కాల్పులు జరిపారు. ఈ ఘటనలో ఎనిమిది మంది ప్రాణాలు కోల్పోయారు. వీరిలో నలుగురు పిల్లలు ఉన్నారు. దేశ రాజధాని సరిహద్దులో ఉన్న తుల్టెపెక్ టౌన్షిప్లో ఈ కాల్పులు జరిగాయని అధికారులు తెలిపారు. ఆదివారం అర్ధరాత్రి నుంచి సోమవారం తెల్లవారుజామున మధ్య (స్థానిక కాలమానం ప్రకారం) నిందితులు ఈ కాల్పులు జరిపారని వెల్లడించారు. ఈ కాల్పుల్లో ఏడుగురు అక్కడికక్కడే మృతిచెందగా.. ఓ మహిళ చికిత్స పొందుతూ ప్రాణాలు కోల్పోయింది. ఈ కాల్పులకు గల కారణాలు తెలియాల్సి ఉంది.
ప్రాణం తీసిన సరదా: మరోవైపు అమెరికాలోని ఫ్లోరిడాలో కూడా కాల్పుల ఘటన వెలుగులోకి వచ్చింది. ఈ కాల్పుల్లో ఓ టీనేజర్ మృతిచెందాడు. బుల్లెట్ ఫ్రూఫ్ జాకెట్లను ధరించి ఇద్దరు మిత్రులు ఒకరిని ఒకరు కాల్చుకున్నారు. ఈ క్రమంలో క్రిస్టోఫర్ బ్రాడ్(15) అనే వ్యక్తి మరణించాడు. ఏప్రిల్ 3వ తేదీన జరిగిన ఈ ఘటన ఆలస్యంగా వెలుగులోకి వచ్చింది. బాలుడు మరణానికి కారణమైన 17 ఏళ్ల నిందితుడిని పోలీసులు అదుపులోకి తీసుకున్నారు.
ఇదీ చదవండి: లాక్‌డౌన్‌తో చైనీయులు ఉక్కిరిబిక్కిరి.. ఆహారం కోసం అరుపులు
