Tiger Meat: సింహం బర్గర్.. పులి మాంసం నగ్గెట్స్.. ఏనుగు నూనెతో చేసిన క్రీమీ చీజ్కేక్.. జీబ్రా సుషీ రోల్స్.. జిరాఫీ హ్యామ్... త్వరలో జరగబోయే ఓ ఫుడ్ ఫెస్టివల్ మెనూలో భాగమిది. ఇదంతా చూస్తే 'ఏప్రిల్ ఫూల్' ప్రాంక్ను ఆలస్యంగా చేస్తున్నారని అనుకున్నారా? కానే కాదు. ఇది ముమ్మాటికీ నిజం. చట్టబద్ధం కూడా. ఇదంతా ఎలా సాధ్యమని అనుకుంటున్నారా?
స్టార్టప్ కంపెనీ వెరైటీ ఆలోచన: చికెన్, మటన్, బీఫ్, పోర్క్.. దాదాపు అన్ని దేశాల్లో తినే మాంసాహారాలు ఇవే. వన్యమృగాల జోలికి వెళ్లడం చట్టవిరుద్ధం. చట్టం సంగతి పక్కనబెడితే.. అసలు వాటిని తినాలన్న ఆలోచనే ఎవరికీ రాదు. ఇందుకు పూర్తి భిన్నంగా ఆలోచించింది లండన్ కేంద్రంగా పనిచేసే ప్రిమేవల్ ఫుడ్స్ అనే అంకుర సంస్థ. సెల్యూలర్ వ్యవసాయంతో ముడిపడిన వ్యాపారం చేసే ఆ సంస్థ.. జంతువుల జోలికి వెళ్లకుండా ల్యాబ్లోనే వన్యమృగాల మాంసాన్ని ఎందుకు అభివృద్ధి చేయకూడదని అనుకుంది.
ల్యాబ్లో మాంసం అభివృద్ధి కొత్తేం కాదు. జంతువుల కణాలను ప్రాసెస్(సెల్ కల్చరింగ్) చేసి పరిశోధనశాలలోనే తయారు చేసిన చికెన్, మటన్ వంటివి ఇప్పటికే మార్కెట్లో ఉన్నాయి. ఈ రంగంలో ఉన్న అవకాశాల్ని సొమ్ము చేసుకునేందుకు అనేక ఫుడ్ టెక్ కంపెనీలు పోటీపడుతున్నాయి. అందుకే ప్రిమేవల్ ఫుడ్స్ మరో అడుగు ముందుకేసింది. 'వీటిని కూడా తింటారా?' అని జనం అనుకునే జంతువులపై దృష్టిపెట్టింది.
Elephant Meat: "మనం చికెన్, బీఫ్ వంటి వాటికే పరిమితం కావడానికి.. అవి రుచికరం, ఆరోగ్యకరం, పోషకాలతో కూడుకున్నవి అనేవి మాత్రమే కారణాలు కాదు. ఆ జంతువులను పెంచడం సులువు కాబట్టే మనం వాటికి ఎక్కువగా అలవాటుపడ్డాం. ఇప్పుడు ల్యాబ్లో అభివృద్ధి చేసే మాంసం విషయంలో మనం ఆ సంప్రదాయ జంతువుల్ని దాటి వెళ్లొచ్చు. మరింత రుచికరమైన, ఆరోగ్యకరమైన, పోషకాలతో కూడుకున్న మాంసాల్ని అభివృద్ధి చేయవచ్చు. ఇలాంటి వాటి వల్ల కొలెస్ట్రాల్, సాచురేటెడ్ ఫ్యాట్స్ వంటి ఇబ్బందులు లేకుండా మన మెదడు, జీర్ణవ్యవస్థలో సరికొత్త మార్పులు వచ్చే అవకాశముంది. ఆయా జంతువుల మాంసంలోని ప్రొటీన్, ఎమైనో యాసిడ్ ప్రొఫైల్లోని విలక్షణత ఇందుకు కారణం. నిద్ర బాగా పట్టేందుకు ఉపకరించే జాగ్వార్ మాంసం, మన ఆలోచనా శక్తిని మెరుగుపరిచే ఏనుగు మాంసం అభివృద్ధి చేయాలని మేము భావిస్తున్నాం." అని వివరించారు ప్రిమేవల్ ఫుడ్స్ పెట్టుబడిదారు సంస్థ అయిన ఏస్ వెంచర్స్ మేనేజింగ్ పార్ట్నర్ యిల్మాజ్ బోరా.
త్వరలోనే రుచి చూపిస్తాం: వన్యమృగాల మాంసంతో చేసిన వంటకాలను ప్రపంచానికి రుచి చూపించేందుకు సిద్ధమవుతోంది ప్రిమేవల్ ఫుడ్స్. రానున్న నెలల్లో లండన్లో టేస్టింగ్ సెషన్ నిర్వహించాలని భావిస్తోంది. ఇందుకోసం ఓ మెనూను రూపొందించి, విడుదల చేసింది.
ఇదీ చదవండి: ప్రతి మూడేళ్లకు విడాకులు, మళ్లీ పెళ్లి.. ఆ జంట వెరైటీ 'రాజీ' ఫార్ములా!
