Gaza Egypt Border Open : గాజా స్ట్రిప్‌లో విదేశీ పాస్పోర్టులు కలిగి ఉన్నవారు, తీవ్రంగా గాయపడ్డవారికి ఉపశమనం కలిగింది. గాజా స్ట్రిప్‌ నుంచి ఈజిప్టునకు వెళ్లే కీలక రఫా క్రాసింగ్‌.. వీరి కోసం తెరుచుకుంది. ఇందుకు ఈజిప్టు, హమాస్‌, ఇజ్రాయెల్‌ మధ్య అమెరికా మద్దతుతో ఖతార్ మధ్యవర్తిత్వంతో ఒప్పందం కుదిరింది.
క్షతగాత్రులను తరలించేందుకు అంగీకరించిన ఈజిప్టు..
విదేశీ పాస్‌పోర్టుదారులే కాక తీవ్రంగా గాయపడ్డ క్షతగాత్రులను కూడా తరలించేందుకు గాజాను అష్టదిగ్బంధనం చేసిన ఇజ్రాయెల్‌తో పాటు ఈజిప్టు కూడా అంగీకరించింది. వారికి తమ దేశంలోని ఆస్పత్రుల్లో చికిత్స అందించేందుకు అంగీకరించింది. తమ దేశం నుంచి గాజా లోపలికి అంబులెన్సులను పంపించి.. తీవ్రంగా గాయపడ్డవారిని తీసుకెళుతోంది ఈజిప్టు. ఇప్పటి వరకు 88 మందిని అంబులెన్సులలో ఈజిప్టుకు తీసుకెళ్లింది.
ఈ ఒప్పందం ఎన్నిరోజులు అమలులో ఉంటుందో ఏ దేశం కూడా వెల్లడించలేదు. అలాగే.. ఒప్పందం కుదరడానికి అటు హమాస్‌ గానీ ఇటు.. ఇజ్రాయెల్‌ గానీ ఎలాంటి షరతులు విధించలేదు. అంతర్జాతీయ మీడియా కథనాల ప్రకారం.. బుధవారం 500 మంది విదేశీ పాస్‌పోర్టుదారులను గాజా వీడి ఈజిప్టు వచ్చేందుకు అనుమతించారు. గాజా జనాభా 23 లక్షలుకాగా వీరిలో ఎంతమందికి విదేశీ పాస్పోర్టులు ఉన్నాయో అధికారికంగా ఎవరూ వెల్లడించలేదు.
మధ్యవర్తిత్వం వహించిన ఖతార్..
Hamas Hostages Recovered : మరోవైపు హమాస్‌ నుంచి కీలక ప్రకటన వెలువడింది. తమ దగ్గర ఉన్న 200 దాకా బందీల్లో ఇజ్రాయెల్‌ కాకుండా ఇతర దేశాలకు చెందిన వారిని విడుదల చేస్తామని హమాస్‌ ప్రకటించింది. ఈ మేరకు హమాస్‌ పోరాట విభాగం.. ప్రతినిధి అల్‌ ఖస్సామ్‌ తెలిపారు. దీనికి కూడా ఖతార్ మధ్యవర్తిత్వం వహించినట్లు సమాచారం.
రఫా సరిహద్దు కీలకం..
Rafah Border Crossing Gaza : యుద్ధం ప్రారంభమైన తర్వాత రఫా సరిహద్దు చాలా కీలకంగా మారింది. గాజాలోకి మానవతా సాయం అందించేందుకు ఈ క్రాసింగ్‌ అత్యంత కీలకం. అయితే చాలా రోజులు ఇజ్రాయెల్‌ అంగీకరించకపోవడం వల్ల మానవతా సాయంతో నిండిన ట్రక్కులు ఈజిప్టులోనే నిలిచిపోయాయి. తర్వాత వివిధ దేశాల జోక్యంతో మానవతాసాయాన్ని రఫా గుండా గాజాలోకి ఇజ్రాయెల్‌ అనుమతించింది.
గాజాలో హమాస్‌ పాలన అంతమైతే పరిస్థితి ఏంటి? ఇజ్రాయెల్‌ పరిపాలన సాగిస్తుందా? అమెరికా ప్లాన్ అదేనట!
