Azerbaijan Vs Armenia Conflict Ceasefire : నాగర్నో-కారబఖ్ ప్రాంతంలో గత రెండు రోజులుగా జరుగుతున్న భీకర దాడులకు ఎట్టకేలకు తెరపడింది. అజర్‌బైజన్‌తో కాల్పుల విరమణ ఒప్పందం కుదిరినట్లు అర్మేనియన్ వార్తా సంస్థలు తెలిపాయి. ఈ ప్రాంతంలో రష్యా శాంతి పరిరక్షక బృందంతో చర్చల ద్వారా ఈ ఒప్పందం కుదిరింది. ఒప్పందంలో భాగంగా నాగర్నో-కారబఖ్ నుంచి అర్మేనియన్ సైనిక దళాలు, సామగ్రిని ఉపసంహరించుకోవడం సహా స్థానిక రక్షణ దళాలను నిరాయుధులను చేయడం వంటివి ఉన్నట్లు తెలుస్తోంది.
Armenia Azerbaijan Ceasefire News :
మంగళవారం నాగర్నో-కారబఖ్ ప్రాంతంలో అజర్బైజన్ దళాలు చేపట్టిన ఆపరేషన్‌లో ఇప్పటి వరకు 100 మంది మరణించారు. కొన్ని వందల మంది తీవ్రంగా గాయపడ్డారు. నాగర్నో-కారబఖ్ నుంచి అర్మేనియన్లను వెళ్లగొట్టేందుకు ఈ దాడులు మొదలుపెట్టినట్లు తెలుస్తోంది. అయితే అజర్బైజన్ మాత్రం దీనిని ఉగ్రవాద వ్యతిరేక ఆపరేషన్‌గా చెబుతోంది. అక్కడ ఉన్న అర్మేనియన్ ప్రజల హక్కులను కాపాడేందుకే ఈ ఆపరేషన్‌ చేపట్టినట్లు చెబుతోంది. రష్యాకు చెందిన శాంతి పరిరక్షక దళాలు ఇక్కడి నుంచి 2వేల మందిని సురక్షిత ప్రాంతాలకు తరలించాయి.
అజర్బైజన్, అర్మేనియా మధ్య కాల్పుల విరమణ జరగక ముందు వరకు నాగర్నో-కారబఖ్ ప్రాంతంలోని స్థానికులు నివాస బేస్‌మెంట్లు, బాంబ్‌ షెల్టర్లలో బిక్కుబిక్కుమంటూ ప్రాణాలు కాపాడుకున్నారు. బాంబు దాడుల వల్ల విద్యుత్తు నిలిచిపోవడం వల్ల రెండు రోజులుగా చీకట్లోనే ఉండిపోయామని ఆవేదన వ్యక్తం చేశారు. పలు భవనాలు, వాహనాలు ధ్వంసమయ్యాయి. ఈ ఘర్షణల్లో గాయపడిన వారికి శాంతి పరిరక్షణ దళాలు తక్షణమే వైద్యసాయం అందించాలని రష్యా విదేశీ వ్యవహారాల శాఖ సూచించింది.
వివాదం ఇదీ..
Armenia Azerbaijan Conflict Explained : వివాదాస్పద నాగర్నో- కరబఖ్‌ ప్రాంతం భౌగోళికపరంగా అజర్బైజన్ దేశంలో ఉంది. అయినా అజర్బైజన్ విధానాలను వ్యతిరేకించే ఆర్మేనియా బలగాలే 1994 నుంచి దానిపై ఆధిపత్యం చెలాయిస్తున్నాయి. వేర్పాటువాదుల పోరాటం తర్వాత ఈ పరిణామాలు చోటుచేసుకున్నాయి. ఒకప్పుడు సోవియట్ యూనియన్‌లో అంతర్భాగమైన అర్మేనియా, అజర్బైజన్.. సాంస్కృతిక, మతపరమైన విభేదాల కారణంగా రెండు దేశాలుగా విడిపోయాయి. నాగోర్నో-కరాబాఖ్పై ఆధిపత్యం కోసం దశాబ్దాలుగా పోరాడుతున్నాయి. గతంలోనూ ఈ ప్రాంతంలో వివాదాలు, హింస చెలరేగాయి. ఈ దేశాల మధ్య 2016 లోనూ భారీ పోరాటమే జరిగింది. ఆ సమయంలో దాదాపు 100 మందికి పైగా మృత్యువాతపడ్డారు.
