విమానాల రాకపోకల కోసం విమానాశ్రయాలున్నాయి. రైళ్ల కోసం రైల్వేస్టేషన్లు ఉన్నాయి. కార్ల కోసం పార్కింగ్ స్థలాలున్నాయి. ఇదే మాదిరిగా సాంకేతికాభివృద్ధి వైపు అడుగులేసే కొన్ని దేశాలు... అధునాతన 'డ్రోన్ పోర్ట్'లు ఏర్పాటు చేసేందుకు సన్నద్ధమవుతున్నాయి.
తాజాగా బ్రిటన్ కూడా డ్రోన్ పోర్టు నిర్మాణం కోసం పెద్ద మొత్తం వెచ్చించేందుకు సిద్ధమైంది. కావెంట్రీ సిటీ సరిహద్దుల్లో 'ఎయిర్-వన్' పేరుతో పోర్ట్ నిర్మాణం చేపట్టేందుకు దాదాపు 1.6 మిలియన్ డాలర్ల(రూ.11 కోట్ల 66 లక్షలు) నిధులను... 'అర్బన్ ఎయిర్ పోర్ట్' సంస్థకు ఇస్తున్నట్లు వెల్లడించింది.
డ్రోన్ పోర్ట్ ఉపయోగాలేంటి?
నిర్ణీత ప్రదేశాల్లో వస్తువులను డెలివరీ చేసేందుకు కొన్ని దేశాలు డ్రోన్లను ఉపయోగించేందుకు సమాయత్తమవుతున్నాయి. ఈ తరహా డ్రోన్లను 'కార్గో డ్రోన్'లు అంటారు. ఇదే మాదిరిగా మనుషులను మోసుకెళ్లే ఎయిర్ టాక్సీలను 'ఈవీటోల్స్' అని అంటారు. అయితే... ఈవీటోల్స్, కార్గో డ్రోన్లు పూర్తిగా విద్యుత్ శక్తి సాయంతోనే పనిచేస్తాయి. వీటి రాకపోకల కోసం రన్వేలు నిర్మించాల్సిన అవసరం కూడా లేదు. ఈ నేపథ్యంలో డ్రోన్ పోర్ట్లు నిర్మించేందుకు వివిధ దేశాలు ముందడుగు వేస్తున్నాయి.
బ్రిటన్ సంస్థ ప్రణాళిక ఏమిటి?
'ఎయిర్-వన్' ప్రాజెక్టు చేపట్టిన అర్బన్ ఎయిర్ సంస్థ... రెండు ఇతర సంస్థలతో ఒప్పందాలు కుదుర్చుకుంది. పెద్ద కార్గో డ్రోన్ల తయారీ కోసం మాల్లోయ్ ఏరోనాటిక్స్తో, ఈవీటోల్ ఎయిర్ క్రాఫ్ట్ తయారీ కోసం హ్యుందాయ్ సంస్థతో కలిసి పనిచేయనున్నట్లు పేర్కొంది. అయితే ఈ ప్రాజెక్టు నిర్మాణం కోసం దాదాపు 2.7 నుంచి 3.4 మిలియన్లు మేరకు ఖర్చు అవుతుందని అర్బన్ ఎయిర్పోర్ట్ సంస్థ వ్యవస్థాపకుడు రిక్కీ సంధు చెబుతున్నారు.
"ప్రయాణికులు సరైన మౌలికసదుపాయాలను ఆనందించాలి. విమానం బుక్ చేసుకునేందుకు, విశ్రాంతి తీసుకునేందుకు వారికి అన్ని ఏర్పాట్లు చేయాలి. దీనికి తగినట్లుగా ప్రాజెక్టు నిర్వహణ జరపాలి. ఐరోపాలోని ఓ సంస్థ 2023 కల్లా పోర్ట్ నిర్మాణం జరపాలని ప్రయత్నిస్తోంది. అమెరికాలోని ఓ సంస్థ కూడా ఇదే వ్యవధిలో పోర్ట్ నిర్మాణం పూర్తి చేయాలని భావిస్తోంది. త్వరలోనే మనుషులను తీసుకెళ్లే ఈవీటోల్స్ రానున్నాయి. బ్రిటన్ సైతం ఈ ప్రాజెక్టు పనులు ముమ్మురం చేయడం అవసరం."
-రిక్కీ సంధు, అర్బన్ ఎయిర్పోర్ట్ వ్యవస్థాపకుడు
రానున్న ఐదు సంవత్సరాల్లో 200లకు పైగా డ్రోన్ పోర్ట్లు నిర్మించాలని ఆశాభావంతో ఉంది అర్బన్ ఎయిర్ పోర్ట్ సంస్థ.
