కరోనా మరణాల రేటు, విటమిన్-డి స్థాయి మధ్య సంబంధాన్ని గుర్తించారు పరిశోధకులు. విటమిన్-డి స్థాయి సగటు తక్కువ ఉన్న 20 ఐరోపా దేశాల్లో మరణాల రేటు అధికంగా ఉందని నిర్ధరించారు. దీనిపై మరింత అధ్యయనం చేసేందుకు సిద్ధమయ్యారు.
కరోనా బాధితుల్లో సైటోకైన్లు అనే తాపజనక కణాలు (ఇన్ఫ్లమేటరీ మాలిక్యూల్స్)ను తెల్ల రక్త కణాలు అధికంగా ఉత్పత్తి చేస్తాయి. విటమిన్-డి వీటి ఉత్పత్తిని నిరోధిస్తున్నట్లు తాజా పరిశోధనల్లో తేలింది. విటమిన్-డి స్థాయి తక్కువ ఉన్న వారిలో శ్వాసకోశ వ్యాధులు తీవ్రంగా ఉన్నట్లు గతంలోనూ పరిశోధకులు గుర్తించారు.
ఉత్తర, దక్షిణాల్లో తేడా..
ఐరోపాలో దేశాలవారీగా అధ్యయనం చేసిన పరిశోధకులు ఒక అంచనాకు వచ్చారు. ఇటలీ, స్పెయిన్లో కరోనా మరణాలు అధికంగా ఉన్నాయి. ఉత్తర ఐరోపా కన్నా ఈ దేశాల్లోనే విటమిన్-డి స్థాయి తక్కువ ఉంటుంది.
కారణం.. దక్షిణ ఐరోపాలో ముఖ్యంగా వృద్ధులు సూర్యరశ్మికి దూరంగా ఉండేందుకు ప్రయత్నిస్తారు. చర్మ వర్ణం కూడా సహజంగా లభించే విటమిన్-డిని స్వీకరించనివ్వదు.
అదే ఉత్తర ఐరోపాలో విటమిన్-డి స్థాయి అధికంగా ఉంటుంది. ఇక్కడి ప్రజలు కాడ్ లివర్ నూనె వంటి విటమిన్-డి అధికంగా ఉండే పదార్థాలు, సూర్య రశ్మిని స్వీకరిస్తారు. ఇందులోని స్కాండినేవియా దేశాల్లో (నార్వే, స్వీడన్, డెన్మార్క్) మరణాల రేటు మరీ తక్కువగా నమోదైంది.
"ఆసుపత్రిలో చేరినవారిలో 75 శాతం మందికి విటమిన్-డి లోపం ఉన్నట్లు ఇదివరకు చేసిన అధ్యయనంలో గుర్తించాం.ఈ విషయాలన్నింటినీ పరిశీలిస్తే విటమిన్-డి స్థాయికి, కరోనా మరణాల రేటు మధ్య సంబంధం ఉన్నట్లు కనిపిస్తోంది. తీవ్రమైన శ్వాసకోశ ఇన్ఫెక్షన్ల నుంచి విటమిన్- డి రక్షిస్తుంది. అందువల్లనే విటమిన్ తక్కువగా ఉండే వృద్ధులపై కరోనా ప్రభావం అధికంగా చూపిస్తోందని భావిస్తున్నాం. "
- లీ స్మిత్, పరిశోధకుడు
తమ బృందం చేసిన పరిశోధన చాలా పరిమితమైనదని లీ స్మిత్ అన్నారు. ఈ కారణాలను పరిగణనలోకి తీసుకుని విటమిన్- డి ప్రభావంపై మరింత పరిశోధన జరగాల్సిన అవసరం ఉందని సూచిస్తున్నారు.
ప్రతి దేశంలో కేసుల సంఖ్య, వైరస్ వ్యాప్తి ఆయా దేశాలు నిర్వహిస్తున్న నిర్ధరణ పరీక్షలు, కట్టడికి తీసుకుంటున్న చర్యలపై ఆధారపడి ఉందని పరిశోధకులు స్పష్టం చేశారు.
