పాకిస్థాన్ నేషనల్ అకౌంటెబిలిటీ బ్యూరో (ఎన్ఏబీ)కి భారీ షాక్ ఇచ్చింది బ్రిటన్ కోర్టు. తమ దేశంలోని పాక్ హై కమిషన్ ఖాతాల నుంచి 28.7 మిలియన్ డాలర్లు జరిమానాల సొమ్మును డెబిట్ చేయాలని ఆదేశించింది లండన్ హైకోర్టు. విదేశీ ఆస్తుల రికవరీ సంస్థ బ్రాడ్షీట్ ఎల్ఎల్సీ కేసుకు సంబంధించి 21 మిలియన్ డాలర్లు జరిమానాను చెల్లించటంలో ఎన్ఏబీ జాప్యం చేసేందుకు ప్రయత్నిస్తున్నందుకుగానూ ఈ నిర్ణయం తీసుకుంది.
కోర్టు ఆదేశాల ప్రకారం ఈ నగదును పాకిస్థాన్ హైకమిషన్ ఖాతాల నుంచి డిసెంబర్ 30 లోపు డెబిట్ చేయాల్సి ఉంది. ఈ విషయాన్ని పాకిస్థాన్ విదేశీ వ్యవహారాల శాఖ వర్గాలు కూడా ధ్రువీకరించాయి. పాక్ హైకమిషన్ ఖాతాల నుంచి మిలియన్ల డాలర్లు డెబిట్ చేయాలని లండన్ కోర్టు ఆదేశించినట్లు పేర్కొన్నాయి.
బ్యాంక్ లేఖ..
కోర్టు ఆదేశాలను సూచిస్తూ.. పాక్ హై కమిషన్కు డిసెంబర్ 29న లేఖ రాసింది యునైటెడ్ బ్యాంక్ లిమిటెడ్ యూకే. 28,706,533.35 డాలర్లు తమ ఖాతాల్లోకి జమ చేసేందుకు అవసరమైన రాతపూర్వక చెల్లింపు సూచనలు, డెబిట్ ఖాతా వివరాలు ఇవ్వాలని కోరింది. డిసెంబర్ 30 లోపు రాతపూర్వకంగా పేమెంట్ సూచనలు ఇవ్వకపోతే.. కోర్టు ఆదేశాలను ఏకపక్షంగా అమలు చేస్తామని స్పష్టం చేసింది.
విదేశీ చట్టాల ఉల్లంఘనే..
మరోవైపు.. బ్యాంకు లేఖను తప్పుపట్టింది పాక్ హైకమిషన్. తమ ఖాతాల నుంచి నగదు బదిలీ చేసేందుకు ఏకపక్ష నిర్ణయాలు తీసుకుంటే అది అంతర్జాతీయ చట్టాలు, నమ్మకాన్ని ఉల్లంఘించటమే అవుతుందని తెలిపింది. అలాంటి నిర్ణయాలతో బ్యాంకుతో ఉన్న సంబంధాలు బలహీనపడతాయని పేర్కొంది.
2018లో..
పాక్ ఎన్ఏబీకి 2018లో 17 మిలియన్ డాలర్ల జరిమానా విధించింది లండన్ అంతర్జాతీయ మధ్యవర్తిత్వ కోర్టు (ఎల్సీఏఐ). ఆ తర్వాత మరో 3 మిలియన్ డాలర్లు కోర్టు ఖర్చుల కింద చేర్చింది. 2019, మార్చిలో మొత్తంగా 20 మిలియన్ డాలర్లు చెల్లించాలని ఆదేశించింది. పాక్ ఎన్ఏబీ జరిమానా చెల్లించకపోవటం వల్ల వడ్డీతో కలిపి మొత్తం 28.7 మిలియన్ డాలర్లకు చేరుకుంది.
ఇదీ చూడండి: రూ. 460కోట్ల ఉగ్రవాద నిధులకు అమెరికా అడ్డుకట్ట
