Telangana Chenetha Abhaya Hastham Scheme : రాష్ట్ర ప్రభుత్వం చేనేత కార్మికులకు సంక్రాంతి కానుక ప్రకటించింది. తెలంగాణ చేనేత అభయ హస్తం పథకం పేరుతో మూడు పథకాలను ప్రారంభిస్తున్నట్లు ఆయా జిల్లాల చేనేత, జౌళిశాఖ అధికారులకు సర్కార్ ఆదేశాలు జారీ చేసింది. దీనిపై చేనేత కార్మికులు హర్షం వ్యక్తం చేస్తూ శనివారం సీఎం రేవంత్ రెడ్డి చిత్రపటాలకు క్షీరాభిషేకం చేశారు.
నేతన్నకు భరోసా : మహబూబ్నగర్ జిల్లా వ్యాప్తంగా 3,503 జియోట్యాగ్ మగ్గాలున్నాయి. వీటిపై గద్వాల, నారాయణపేట రకం చీరలను కార్మికులు నేస్తున్నారు. తెలంగాణ బ్రాండ్ పేరుతో ఉన్న ఉత్పత్తులను ప్రోత్సహించాలనే లక్ష్యంతో రాష్ట్ర ప్రభుత్వం తెలంగాణ మార్క్ లేబుల్ను అందిచనుంది. ఈ లేబుల్ ఉన్న ప్రధాన కార్మికులకు ఏడాదికి రూ.18వేలు, అనుబంధ కార్మికుని రూ.6వేలు అందించనుంది.
నేతన్న పొదుపు : గతంలో నేతన్నకు చేయూత పథకం పేరుతో కార్మికులు 8 శాతం బ్యాంకులో ఖాతాలో జమ చేస్తే ప్రభుత్వం 16 శాతం సొమ్మును జమ చేసింది. గత సెప్టెంబరు వరకు అమలైన ఈ పథకం కింద ఉమ్మడి జిల్లాలోని 9,612 మంది కార్మికులకు రూ. 66.49 కోట్లు ఇచ్చారు. కాగా తాజాగా ఈ పథకాన్ని తెలంగాణ నేతన్న పొదుపు పేరుతో అమలు చేయనున్నారు. గతంలో మూడేళ్ల కాల వ్యవధి ఉన్న ఈ పథకాన్ని ప్రస్తుతం రెండేళ్లకు తగ్గించారు. దీని ద్వారా అరకొర కూలీ వేతనాలతో కాలం గడుపుతున్న 11,041 మంది చేనేత కార్మికులకు ప్రయోజనం చేకూరనుంది.
జీవిత కాల ఉచిత బీమా : కార్మికుల జీవిత కాల బీమా అందించనున్నట్లుగా ఇప్పటికే ప్రభుత్వం ప్రకటించగా తాజాగా ఈ పథకం కోసం రూ.9 కోట్లు కేటాయించింది. 18 సంవత్సరాలు నిండిన కార్మికులు ఏ కారణం చేత మరణించినా వారి కుటుంబాలకు రూ.5లక్షలు చొప్పునా బీమా అందించనున్నారు. 59 ఏళ్ల లోపు వారికి ఎల్ఐసీ ద్వారా, ఆపై వయసున్న వారికి టెస్కో ద్వారా ఎక్స్గ్రేషియా చెల్లించనున్నారు.
