కరోనా చికిత్సకు తొలిసారి మాత్ర (Pills for Covid treatment) అందుబాటులోకి వచ్చింది. మోల్నుపిరవిర్ పేరుతో మెర్క్ ఫార్మా సంస్థ అభివృద్ధి చేసిన ఈ పిల్.. కరోనాపై సమర్థంగా పోరాడుతోందని తేలింది. కరోనా బాధితుల కోసం దీన్ని వినియోగించేందుకు బ్రిటన్ ప్రభుత్వం అనుమతి ఇచ్చింది.
కొవిడ్ బారిన పడ్డ వయోజనుల కోసం ఈ పిల్స్ వినియోగించవచ్చు. అయితే కరోనా రిస్క్ ఫ్యాక్టర్లలో ఏదో ఒకటి బాధితులకు ఉంటేనే వీటిని తీసుకోవాలని యూకే నియంత్రణ సంస్థ పేర్కొంది. ఐదు రోజుల పాటు రోజుకు రెండు సార్లు ఈ మాత్రను తీసుకోవాల్సి ఉంటుంది.
అమెరికా ఎఫ్డీఏ వద్ద మోల్నుపిరవిర్ దరఖాస్తు పెండింగ్లో ఉంది. దీనికి అనుమతులు లభించకముందే చాలా వరకు దేశాలు మాత్రల కోసం ముందస్తు ఆర్డర్లు ఇచ్చేశాయి.
మెరుగైన ఫలితం...
ప్రముఖ అంతర్జాతీయ ఫార్మా సంస్థ మెర్క్.. ఈ ఔషధాన్ని మోల్నుపిరవిర్ పేరుతో రూపొందించింది. ఇది ప్రయోగాల్లో మెరుగైన ఫలితాలు చూపించినట్లు సంస్థ వెల్లడించింది. కొత్తగా వైరస్‌ బారినపడుతున్న బాధితులకు ఆస్పత్రుల్లో చేరికలు, మరణాలను సగానికి తగ్గించినట్లు పేర్కొంది. మాత్రల రూపంలో తీసుకొచ్చిన ఈ ఔషధం అత్యవసర వినియోగం కోసం అమెరికా సహా పలు దేశాల్లో దరఖాస్తు చేసుకుంది.
మోల్నుపిరవిర్ వల్ల కలిగే దుష్ప్రభావాలు చాలా సాధారణంగా ఉన్నట్లు నిపుణులు వెల్లడించారు. కొవిడ్ చికిత్సలో వినియోగిస్తున్న ఇంజెక్షన్‌ రూపంలో ఉన్న మందుల కంటే మాత్రల రూపంలో ఉన్న ఈ ఔషధం బాధితులకు ఉపయుక్తంగా ఉంటుందని భావిస్తున్నారు.
ఇదీ చదవండి:
