ఐరోపా సమాఖ్య(ఈయూ)-బ్రిటన్ల మధ్య కీలక వాణిజ్య ఒప్పందం ఎట్టకేలకు పూర్తయింది. దీంతో బ్రెగ్జిట్ ప్రక్రియ పూర్తయింది. బ్రెగ్జిట్ గడువుకు(ఈ నెల 31) కొన్ని రోజుల ముందు ఈ ఒప్పందం జరిగింది.
ఒప్పందం పూర్తయిన అనంతరం.. "మేము బ్రెక్సిట్ పూర్తి చేశాం, స్వతంత్ర వాణిజ్య దేశంగా లభించే అద్భుతమైన అవకాశాలను ఇప్పుడు పూర్తిగా ఉపయోగించుకోవచ్చు. ప్రపంచవ్యాప్తంగా ఇతర దేశాలతో వాణిజ్య ఒప్పందాలను కుదుర్చుకుంటాం." అని బ్రిటన్ ఓ ప్రకటనలో తెలిపింది.
"ఈయూతో సున్నా సుంకాలు, సున్నా కోటాల ఆధారంగా తొలి స్వేచ్ఛా వాణిజ్య ఒప్పందంపై సంతకం చేయడం ఓ అద్భుత పరిణామం. ఇది 668 బిలియన్ పౌండ్లు విలువ చేసే అతిపెద్ద ద్వైపాక్షిక వాణిజ్య ఒప్పందం" అని పేర్కొంది. బ్రిటన్ తన డబ్బు, సరిహద్దులు, చట్టాలు, వాణిజ్యం, ఫిషింగ్ వాటర్స్పై తిరిగి నియంత్రణ సాధించింది అని పేర్కొంది.
పూర్తి స్వేచ్ఛ
ఈ ఒప్పందంతో బ్రిటన్ ఇకపై ఈయూ పరిధి, నిబంధనలకు కట్టుబడి ఉండక్కర్లేదని స్పష్టం చేసింది. బ్రిటన్ విషయంలో ఐరోపా కోర్ట్ ఆఫ్ జస్టిస్‌కు జోక్యం చేసుకోవడానికి అవకాశం లేదు. సార్వభౌమాధికారంపై ఉన్న అడ్డంకులు తొలగిపోయాయని పేర్కొంది బ్రిటన్. 2021 జనవరి 1న మాకు పూర్తి రాజకీయ, ఆర్థిక స్వాతంత్ర్యం లభిస్తుందని ప్రకటించింది.
ఇదీ చూడండి: ప్రచండతో చైనా రాయబారి కీలక భేటీ
