రాత్రివేళ సంగీతం వినిపిస్తూ రెండుగా చీలిపోయే బ్రిడ్జ్​

పగటి పూట అది నదిపై ఉండే.. ఓ మామూలు వంతెన. దానిపై ప్రజలు ఎప్పటిలానే రాకపోకలు సాగిస్తుంటారు. అయితే.. రాత్రయిందంటే చాలు.. ఆ వంతెన రెండుగా చీలిపోతూ తెరుచుకుంటుంది. ఆ సమయంలో శ్రావ్యమైన సంగీతం కూడా వినిపిస్తుంది. వింతగా అనిపిస్తోంది కదూ! అయితే.. ఈ వంతెన విశేషాలేంటో మీరూ తెలుసుకోండి.

అర్ధరాత్రి సమయం.. వీనుల విందైన సంగీతం.. విద్యుద్దీపాల సోయగం.. అప్పుడే ఓ అరుదైన దృశ్యం ఆవిష్కృతమైంది. నదిపై ఉండే వంతెన రెండుగా చీలుకుంటూ నెమ్మదిగా తెరుచుకుంది. రష్యాలోని సెయింట్​ పీటర్స్​బర్గ్ తీర​ ప్రాంతం ఈ అపురూప ఘట్టానికి వేదికైంది. 'సింగింగ్ బ్రిడ్జెస్'​ ప్రాజెక్టులో భాగంగా.. ప్యాలెస్ వంతెనను అక్కడి అధికారులు తెరిచారు.

రష్యాలోని ప్రముఖ సంగీతకారులు.. స్వరపరిచిన సంగీతం వినిపిస్తుండగా.. ప్యాలెస్​ బ్రిడ్జ్​ వంతెన తెరుచుకుంది. ఏటా వేసవి కాలంలో అర్ధరాత్రి పూట ఈ వంతెనలను తెరుస్తూ ఉంటారు. అయితే.. ఈ ప్యాలెస్​ వంతెన దానంతట అదే తెరుచుకోదు. అక్కడ ​ హెడ్​ ఇంజినీర్​గా పని చేస్తున్న స్టానిస్లావ్​​ ఫుస్తాషిన్​స్కీ ఇందులో కీలక పాత్ర పోషిస్తారు.

కంట్రోల్​ రూంలో ఉంటూ ప్యాలెస్​ వంతెన తెరిచే పూర్తి బాధ్యతను నిర్వర్తిస్తారు స్టాన్​స్లివ్​. అక్కడ ఉండే ఓ మానిటర్​లో పరిస్థితిని వీక్షిస్తూ ఆయన వంతెనను తెరుస్తారు.

ఎలా పని చేస్తుందంటే..?

సెయింట్​ పీటర్స్​బర్గ్​లో ఉన్న ఇలాంటి తెరుచుకునే వంతెనల పనితీరు.. ఒకదానికొకటి భిన్నంగా ఉంటుంది. అంటే.. ట్రోయిటిస్కీ వంతెనను తెరిచేవారు.. ప్యాలెస్​ బ్రిడ్జ్​ను తెరవలేరు. హైడ్రాలిక్​ వ్యవస్థ ద్వారా ప్యాలెస్​ బ్రిడ్జ్​ పని చేస్తుంది. దీని వెనుక ఉండే సాంకేతికత శ్రమను స్టాన్​స్లివ్​ ఇలా వివరిస్తున్నారు.

"ఈ కంట్రోల్​ రూంలో రెండు విభాగాలు ఉంటాయి. అవి రెండు సమానంగా పని చేస్తున్నాయనే విషయాన్ని మనం ఇక్కడ మానిటర్​లో చూడవచ్చు. ఈ రెండు నియంత్రణ వ్యవస్థలు.. ఒకదానితో మరొకదానికి సంబంధం లేకుండా పని చేస్తాయి. ఈ రెండు నియంత్రణ వ్యవస్థల్లో ఏదైనా ఒకదాంట్లో సమస్య తలెత్తినా.. మరో దాంతో మనం పని చేసుకోవచ్చు."

-స్టానిస్లావ్​ ఫుస్తాషిన్, ప్యాలెస్​ వంతెన హెడ్​ ఇంజినీర్​.

నేవా నది మీద ఉండే.. ఈ ప్యాలెస్​ వంతెనపై పగటి పూట వాహనాలు, ప్రజలు రాకపోకలు సాగిస్తుంటారు. రాత్రి సమయాల్లో మాత్రమే పెద్ద పెద్ద నౌకలు వెళ్లేందుకు వీలుగా వంతెనను తెరుస్తారు.

సెయింట్​ పీటర్స్​బర్గ్​ తీర ప్రాంతంలో.. మొత్తం 21 వంతెనలు​ ఉన్నప్పటికీ.. ప్యాలెస్​ వంతెన, ట్రోయిటిస్కీ వంతెనలు ఎంతో ఫేమస్​. ఇక్కడ ఉన్న కొన్ని వంతెనల్లో 18వ శతాబ్దానికి చెందినవని కూడా ఉన్నాయని అధికారులు తెలిపారు. ఈ వంతెనలు తెరుచుకునే సమయంలో.. నదీ తీరంలో స్పీకర్లను అమరుస్తారు. అందుకే ఈ కార్యక్రమాన్ని సింగింగ్​ బ్రిడ్జెస్​ ప్రాజెక్టు​గా పిలుస్తుంటారు.

"శ్రావ్యమైన సంగీతాన్ని వినిపించడమే.. సింగింగ్ బ్రిడ్జెస్ ప్రాజెక్టుకు అర్థం. సెయింట్ పీటర్స్​ బర్గ్​ ప్రాంతానికి చెందిన సంగీతకారుల స్వరపరిచిన సంగీతం ఇక్కడ ఎక్కువగా వినిపిస్తుంది. ఈ సంగీతాన్ని వినేందుకు ప్రజలు ఇక్కడకు తరలి వస్తుంటారు. ఆ సమయంలో వంతెనలు తెరుచుకునే దృశ్యాలు చూసి మురిసిపోతారు."

- కిరిల్​ స్మిర్నోవ్​, జనరల్​ డైరెక్టర్ ఆఫ్​ పెట్రో సెంటర్​

జూన్ నుంచి సెప్టెంబర్ మధ్య ప్రతి శుక్రవారాల్లో ఈ కార్యక్రమాన్ని నిర్వహిస్తూ ఉంటారు. వీటిని వీక్షించేందుకు పెద్ద ఎత్తున పర్యటకులు తరలివస్తారు.

ఇదీ చూడండి: World LeftHanders Day: ఎడమ చేతి వాటం వ్యక్తుల ప్రత్యేకతలివే!

ఇదీ చూడండి: హెలికాఫ్టర్ ఎమర్జెన్సీ​ ల్యాండింగ్​​.. ఎందుకో తెలిస్తే షాక్​!