ఆస్ట్రాజెనెకా టీకా.. రక్తం గడ్డకట్టడానికి కారణమవుతుందనే ఉద్దేశంతో తాత్కాలికంగా నిలిపివేసిన కొన్ని ఐరోపా దేశాలు తిరిగి ప్రారంభించనున్నాయి. ఈ టీకా సురక్షితమేనని ఐరోపా సమాఖ్య ఔషధ నియంత్రణ సంస్థ(ఈయూఎంసీ) స్పష్టం చేసిన తర్వాత స్పెయిన్, సిప్రస్, ఇటలీ, ఫ్రాన్స్, జర్మనీ దేశాలు ఈ మేరకు నిర్ణయం తీసుకున్నాయి.
వచ్చే వారం నుంచి వ్యాక్సిన్ పంపిణీని పునఃప్రారంభిస్తున్నట్లు స్పెయిన్ ఆరోగ్య మంత్రి కరోలినా డారియాస్ ప్రకటించారు. ఈ మేరకు ప్రాంతీయ ప్రభుత్వ ఆరోగ్య నిపుణులతో భేటీ అవుతామని తెలిపారు. వచ్చే బుధవారం నుంచి టీకా అందిస్తామని పేర్కొన్నారు. సిప్రస్.. శుక్రవారం నుంచే టీకా పంపిణీ ప్రారంభించనున్నట్లు తెలిపింది. ఇటలీలోనూ వాక్సినేషన్ ప్రక్రియ తిరిగి ప్రారంభించనున్నట్లు ప్రకటించింది.
ఆస్ట్రాజెనెకా టీకాకు, రక్తం గడ్డకట్టడానికి ఎలాంటి సంబంధం లేదని పేర్కొన్న ఈయూఎంసీ.. టీకా పంపిణీ ఈయూ దేశాలు తిరిగి ప్రారంభించాలని సూచించింది.
ఇదీ చూడండి: ఆస్ట్రాజెనెకా టీకా సురక్షితమే: ఐరోపా సమాఖ్య
