కరోనా వైరస్‌ను కట్టడి చేయడంలో భాగంగా ప్రపంచవ్యాప్తంగా చాలా దేశాల్లో ఇంకా లాక్‌డౌన్‌ ఆంక్షలు కొనసాగుతున్నాయి. ఈ క్రమంలోనే ప్రజలంతా సామాజిక దూరం పాటిస్తూ ఎక్కువ శాతం ఇళ్లకే పరిమితమయ్యారు. అయితే లాక్‌డౌన్‌ కారణంగా షాపింగ్‌ మాల్స్‌, సినిమా థియేటర్స్‌, రెస్టారెంట్లు.. ఇలా జనసందోహం ఎక్కువగా ఉండే ప్రాంతాలన్నీ మూతపడ్డాయి. ఇలాంటి పరిస్థితుల్లోనూ సామాజిక దూరం పాటించాలి, ఒక్కరే రావాలి అనే నియమాలతోనే ఓ రెస్టారెంట్ను ప్రారంభించారు స్వీడన్‌కు చెందిన ఓ జంట. రెస్టారెంట్లో సామాజిక దూరం.. అదెలా సాధ్యం అనేగా మీ సందేహం? అయితే అసలు స్టోరీలోకి వెళ్లాల్సిందే..
రాస్మస్‌ పెర్సన్‌, లిండా కార్ల్‌సన్‌.. స్వీడన్‌లోని వార్మ్‌లాండ్‌ కౌంటీకి చెందిన ఈ భార్యాభర్తలు మే 10న 'టేబుల్‌ ఫర్‌ వన్‌' పేరుతో ఓ రెస్టారెంట్‌ని ప్రారంభించారు. అసలే స్వీడన్‌లో కేసులు ఎక్కువ అవుతుంటే వీళ్లు రెస్టరంట్‌ ఎలా ప్రారంభిస్తారు? అలా అయితే సామాజిక దూరం పాటించడం ఎలా సాధ్యమవుతుంది? అని ఆలోచిస్తున్నారా? అలాంటి భయాలేవీ లేకుండా అటు సామాజిక దూరం పాటిస్తూనే ఇటు రెస్టారెంట్ను ప్రారంభించాలన్న ఆలోచన చేసిందీ జంట.
వినూత్న ఐడియా...
లాక్‌డౌన్‌ సమయంలో కార్ల్‌సన్‌ తల్లిదండ్రులు వారి ఇంటికి వచ్చారు. ఇల్లు కాస్త చిన్నదిగా ఉండడంతో.. అందులోనూ కరోనా సామాజిక దూరం పాటించాల్సి రావడం వల్ల రాస్మస్‌ ఇంటి పక్కన ఉన్న పొలంలో భోజనం ఏర్పాట్లు చేశారు. ప్రశాంతమైన వాతావరణంలో కూర్చొని ఇలా భోంచేయడం ఎంతో ఆహ్లాదంగా ఉందని భావించిన రాస్మస్‌ ఈ 'టేబుల్‌ ఫర్‌ వన్‌' రెస్టరంట్‌కి నాంది పలికాడు.
సింగిల్‌ టేబుల్‌.. సింగిల్‌ పర్సన్‌!
వృత్తిరీత్యా చెఫ్‌ అయిన తన భర్త రాస్మస్‌ ఆలోచనకు లిండా కూడా సహకరించింది. ఈ రెస్టారెంట్లో భాగంగా తమ ఇంటి పక్కన ఉండే పొలం మధ్యలో ఒక డైనింగ్‌ టేబుల్‌, దాని ముందు ఒక కుర్చీని ఏర్పాటు చేశారు. అక్కడి నుంచి రాస్మస్‌ ఇంటి వంటగదికి ఒక తాడు కట్టి.. దానికి ఓ బుట్ట వేలాడదీశారు. రెస్టారెంట్కు వచ్చిన వాళ్లు ఆ టేబుల్‌ వద్ద కూర్చొని ఆర్డర్‌ ఇస్తే.. రాస్మస్‌ జంట వాటిని వండి వేడివేడిగా ఆ బుట్టలో వేసి టేబుల్‌ వద్దకు పంపుతుంది. ఇలా ఈ సింగిల్‌ టేబుల్‌ రెస్టారెంట్లోకి ఒక రోజు కేవలం ఒకరికి మాత్రమే అనుమతి ఉంటుందని చెబుతున్నారీ స్వీడిష్‌ కపుల్‌. మే 10న ప్రారంభించిన ఈ రెస్టరంట్‌ను ఆగస్టు 1 వరకు మాత్రమే అందుబాటులో ఉంచనున్నారట.
తోచినంత ఇవ్వచ్చు..
ఈ వినూత్న రెస్టరంట్‌ గురించి లిండా మాట్లాడుతూ.. "ఈ కరోనా కల్లోలం కారణంగా చాలామంది తమ ఉద్యోగాలను, ప్రియమైన వారిని కోల్పోయిన బాధలో ఉన్నారు. ఆర్థికంగా ఇబ్బందులు ఎదుర్కొంటున్న వారు ఎందరో! అందుకే మేము మా రెస్టారెంట్కు వచ్చిన వారు భోజనానికి ఇంత చెల్లించాలి అన్న నియమమేమీ పెట్టలేదు. ఎవరికి తోచినంత వారు ఇవ్వచ్చు.. ఒంటరిగా వచ్చిన వ్యక్తి ప్రశాంతంగా ఒక చోట కూర్చొని భోంచేసే అవకాశం మేం కల్పిస్తున్నామన్న సంతృప్తి మాకు చాలు.." అంటున్నారీ అందాల జంట. తమ రెస్టారెంట్కు వస్తోన్న స్పందనను చూసి ఆగస్టు తర్వాత కొనసాగించాలా, వద్దా అన్న విషయం గురించి ఆలోచిస్తామంటున్నారీ కపుల్‌.
