యూకేలో 33 ఏళ్ల సారా ఎవెరార్డ్ కిడ్నాప్, హత్య కేసులో నిరసనలతో బ్రిటన్ అట్టుడుకుతోంది. ఈ కేసులో ఓ పోలీస్ అధికారిని మెట్రోపాలిటన్ కోర్టు దోషిగా తేల్చిన నేపథ్యంలో దేశవ్యాప్తంగా పోలీసులపై తీవ్ర వ్యతిరేకత వ్యక్తమవుతోంది. కరోనా నిబంధనలు లెక్కచేయకుండా ప్రజలు పెద్ద ఎత్తున రోడ్లపైకి వచ్చి పోలీస్ చర్యకు వ్యతిరేకంగా ఆందోళనలు చేపట్టారు. నిరసనకారులు, పోలీసుల మధ్య జరిగిన ఘర్షణలు సామాజిక మాధ్యమాల్లో వైరల్గా మారాయి. ఈ ఘటనపై బ్రిటన్ ప్రధాని బోరిస్ జాన్సన్ స్పందించారు. సారా కుటుంబసభ్యుల గురించే ఆలోచిస్తున్నట్లు ట్విట్టర్లో పేర్కొన్నారు. ఈ కేసుపై సమగ్ర దర్యాప్తు నిర్వహిస్తామన్నారు. ఈ ఘటనకు సంబంధించి దర్యాప్తును వేగవంతం చేయాలని యూకే హోమ్ సెక్రటరీ ప్రీతి పాటిల్.. అధికారులను ఆదేశించారు.
మరోవైపు సారా మెమోరియల్ ప్రాంతం వద్ద.. వేల సంఖ్యలో మద్దతుదారులు కూడి.. శ్రద్ధాంజలి ఘటించారు. ఆమె సమాధి వద్ద పుష్పగుచ్ఛాలతో నివాళులు అర్పించారు.
మార్చి 3న.. బ్రిటన్ సౌత్ లండన్లోని క్లాఫమ్ నుంచి బ్రిక్స్టన్కు నడుచుకుంటూ వెళ్తున్న సారా ఎవెరార్డ్ కిడ్నాప్కు గురయ్యారు. లండన్ కు 100 కిలోమీటర్ల దూరంలోని వుడ్ ల్యాండ్ ప్రాంతంలో ఆమె మృతదేహం లభ్యమైంది.
ఇదీ చదవండి : పార్టీలో కాల్పులు- ఇద్దరు మృతి
