ప్రపంచవ్యాప్తంగా కరోనా విజృంభిస్తోంది. ఆసియా దేశాల్లో కేసులు రికార్డు స్థాయిలో పెరుగుతున్నాయి.
రష్యాలో ఇవాళ 7,523 కొత్త కేసులు వెలుగుచూశాయి. మొత్తం కేసుల సంఖ్య 11 లక్షల 43 వేల 571కి చేరాయి. రాజధాని మాస్కోలోనే 1,792 మందికి వైరస్ సోకింది. ఒక్కరోజే 169 మంది చనిపోయారు.
- నేపాల్లో మొత్తం కేసులు 71 వేల 821కి చేరాయి. ఇవాళ 1207 కొత్త కేసుల్ని గుర్తించారు. మరో 8 మరణాలతో మొత్తం మృతుల సంఖ్య 467కి చేరింది. లాక్డౌన్ ఆంక్షల్ని క్రమంగా సడలిస్తున్న నేపథ్యంలో కేసులు పెరుగుతున్నట్లు భావిస్తున్నారు.
- సింగపూర్లో మరో 20 మంది వైరస్ బారినపడ్డారు. మొత్తం కేసులు 57 వేల 685కు చేరాయి. ఇందులో 5 విదేశాల నుంచి వారేనని ఆరోగ్య శాఖ తెలిపింది.
- ఫిలిప్పీన్స్లో మొత్తం కొవిడ్ కేసులు 3 లక్షల మార్కు దాటాయి. శనివారం నమోదైన 2,747 కేసులతో కలిపి దేశంలో మొత్తం 3,01,256 మందికి కరోనా సోకింది. టెస్టుల సంఖ్య పెంచుతున్న నేపథ్యంలోనే కేసులు పెరుగుతున్నాయని అధికారులు అంటున్నారు.
ఆంక్షలు కఠినం..
బ్రిటన్లో కరోనా రెండో దశ నేపథ్యంలో.. ఆంక్షల్ని కఠినతరం చేస్తున్నారు. ఇంగ్లాండ్లో కరోనా హాట్స్పాట్ల సంఖ్యను 58 నుంచి 92కు పెంచారు. దేశంలో కరోనా కట్టడి కోసం మరింత కఠిన ఆంక్షలు విధించాలని ప్రధాని బోరిస్ జాన్సన్ను కోరారు లండన్ మేయర్ సాదిఖ్ ఖాన్. ప్రజలు చాలా నిర్లక్ష్యంగా వ్యవహరిస్తున్నారని అన్నారు.
మరోవైపు దేశంలో లాక్డౌన్ నిబంధనలు ఉల్లంఘిస్తూ.. వేలాది మంది లండన్ వీధుల్లో యాంటీ-లాక్డౌన్ ర్యాలీ చేపట్టారు. ఐదుగురి కంటే ఎక్కువ గుమికూడొద్దు అన్న ఆంక్షలపై గుర్రుగా ఉన్న స్థానికులు.. ప్రభుత్వ వ్యతిరేక నినాదాలు చేశారు.
- బ్రిటన్లో 6 వేల 42 కొత్త కేసులు.. 34 మరణాలు నమోదయ్యాయి.
- ఐరోపా దేశం స్లొవేకియాలో ఒక్కరోజే రికార్డు స్థాయిలో కేసులు పెరిగాయి. తొలిసారి ఆ దేశంలో 500కుపైగా కొత్త కేసులు బయటపడ్డాయి. 552 మందికి వైరస్ సోకగా.. మొత్తం కేసులు 8,600కు చేరాయి. ఇప్పటివరకు ఆ దేశంలో 44 మంది చనిపోయారు. ఈ నేపథ్యంలో దేశంలో ఆంక్షలు విధించేందుకు సిద్ధమని స్పష్టం చేశారు ప్రధాన మంత్రి.
