కరోనా నివారణ దిశగా ఎన్నో ఆశలు రేపుతున్న ఆస్ట్రాజెనెకా టీకా అతి త్వరలోనే అందుబాటులోకి రానున్నట్లు ప్రముఖ బ్రిటన్ పత్రిక "ది సన్" పేర్కొంది. 'టీకాల తొలి బ్యాచ్‌ను వచ్చే వారంలో స్వీకరించడానికి సిద్ధంగా ఉండాలని లండన్‌లోని ఓ ప్రముఖ ఆసుపత్రికి ఆదేశాలు వెళ్లాయని' ది సన్ పత్రిక తన కథనంలో వెల్లడించింది. టీకాను ఆక్స్ఫోర్డ్, ఆస్ట్రాజెనెకా సంయుక్తంగా అభివృద్ధి చేస్తుండగా.. బ్రిటన్ ప్రభుత్వ ఆధ్వర్యంలో నేషనల్‌ హెల్త్‌ సర్వీస్‌ (ఎన్హెచ్ఎస్).. నవంబర్‌ 2న ప్రారంభమయ్యే వారంలో ఆస్ట్రాజెనికా టీకాల తొలి దశ పంపిణీ చేపట్టాడానికి సిద్ధమవుతున్నట్లు రాసుకొచ్చింది.
తొలుత వారికే..
దీనికోసం ఆ ప్రముఖ ఆసుపత్రిలోని సిబ్బందిని వినియోగించనుందని.., అందుకు అనుగుణంగా ఆసుపత్రిలోని అన్ని వైద్యసేవలను.. ఇప్పటికే నిలిపివేశారని వెల్లడించింది. ఆ ఆసుపత్రి సిబ్బంది ద్వారా ముందుగా వేల సంఖ్యలో వైద్యులు, నర్సులు కొవిడ్‌పై పోరాడుతున్న ఇతరులకు.. టీకాలు వేయనున్నారని తెలిపింది.
ప్రయోగ దశలో ఉన్న ఈ టీకాకు అనుమతి లభించిన వెంటనే తదుపరి ప్రక్రియ చేపట్టడానికి సిద్ధంగా ఉండాలని.. ఆ ఆసుపత్రికి ఆదేశాలు అందాయని వివరించింది ది సన్. అయితే నవంబర్‌ 2 నుంచే టీకా పంపిణీ మొదలవుతుందన్న వార్తలను ఎన్హెచ్ఎస్ ధ్రువీకరించలేదు.. ఖండించనూ లేదు. మరోవైపు వచ్చే ఏడాది ప్రథమార్థంలో టీకా పంపిణీకి సన్నాహాలు చేస్తున్నట్లు బ్రిటన్ ఆరోగ్య శాఖ కార్యదర్శి మాట్‌ హన్‌కాక్‌ పేర్కొనడం గమనార్హం.
ఇదీ చూడండి:హ్యూమన్ ట్రయల్స్లో ఆక్స్ఫర్డ్ టీకా ఫలితాలు ఆశాజనకం
