తమ దేశంలో జాత్యాహంకారానికి చోటులేదని బ్రిటన్ వెల్లడించింది. బ్రిటన్ రాజకుటుంబానికి చెందిన హ్యారీ, మేఘన్ మార్కెల్ దంపతులు అమెరికాలోని పాపులర్ టీవీ షోకు ఇచ్చిన ఇంటర్వ్యూ నేపథ్యంలో ఆ దేశం స్పందించింది. ప్రిన్స్‌ హ్యరీని పెళ్లి చేసుకొని బ్రిటన్ రాజకుటుంబంలోకి అడుగుపెట్టాక ఎన్నో ఇబ్బందులు పడ్డానని మేఘన్ వెల్లడించారు. గర్భవతిగా ఉన్న సమయంలో బిడ్డ రంగు గురించి చర్చ జరిగిందని, నల్లగా పుడతాడనే ఆందోళన వ్యక్తమైందని కన్నీటి పర్యంతమయ్యారు.
ఈ క్రమంలో 'తమ సమాజంలో జాత్యాహంకారానికి ఏ మాత్రం తావు లేదు' అని బ్రిటన్ మంత్రి విక్కీ ఫోర్డ్ మీడియాతో వ్యాఖ్యానించారు. అలాగే తానింతవరకు ఆ ఇంటర్వ్యూను చూడలేదని కూడా చెప్పారు. కాగా, రాజకుటుంబంతో విభేదాల కారణంగా హ్యారీ దంపతులు తమ హోదాలను వీడి, అమెరికాలోని కాలిఫోర్నియాలో స్థిరపడ్డారు.
బోరిస్ నో కామెంట్..
హ్యారీ, మేఘన్ దంపతుల జాత్యాహంకార వ్యాఖ్యలపై మాట్లాడేందుకు బ్రిటన్ ప్రధాని బోరిస్ జాన్సన్ నిరాకరించారు. రాజకుటుంబానికి సంబంధించి దేశవ్యాప్తంగా ఉన్నతమైన విలువ ఉందని ప్రధాని పేర్కొన్నారు. వారి అంతర్గత విషయాలపై మాట్లాడేందుకు విముఖత చూపించారు.
