కొవిడ్-19 చికిత్సకు దివ్య ఔషధంగా పనిచేస్తుందని భావిస్తోన్న హైడ్రాక్సీక్లోరోక్విన్తో ఎలాంటి ప్రయోజనం లేదని బ్రిటన్ పరిశోధన తెలిపింది. ఇది రోగులపై ఎలాంటి ప్రభావం చూపించడం లేదని పేర్కొంది. ప్రఖ్యాత ఆక్స్ఫర్డ్ యూనివర్సిటీకి చెందిన పరిశోధన సంస్థ ఈ వివరాలను వెల్లడించింది.
కొవిడ్-19 సోకిన 1,542 మంది రోగులకు హైడ్రాక్సీక్లోరోక్విన్తో చికిత్స అందించి వివరాలను పరిశీలించారు. సాధారణ చికిత్స తీసుకున్న మరో 3,132 కరోనా రోగుల వివరాలతో వీటిని పోల్చిచూశారు. 28 రోజుల అనంతరం హైడ్రాక్సీక్లోరోక్విన్ ఎలాంటి ప్రభావం చూపలేదని తేల్చారు. ఈ ఔషధం కారణంగా కొవిడ్-19 మరణాల సంఖ్య తగ్గలేదని ప్రొఫెసర్ పీటర్ హార్బీ, మార్టిన్ లాండ్రే సంయుక్త ప్రకటనలో తెలిపారు.
హైడ్రాక్సీక్లోరోక్విన్, క్లోరోక్విన్లను మలేరియా చికిత్సకు ప్రధాన ఔషధంగా ఉపయోగిస్తారు. ఇది కొవిడ్-19పై పోరులో గొప్ప మార్పుగా అవతరిస్తుందని అమెరికా అధ్యక్షుడు డొనాల్డ్ ట్రంప్ వ్యాఖ్యానించిన అనంతరం దీని వాడకంపై ప్రపంచ దేశాలు దృష్టి సారించాయి. కరోనా బారిన పడకుండా ఉండేందుకు ఈ మాత్రలను కొద్ది రోజుల పాటు తీసుకున్నట్లు ట్రంప్ స్వయంగా వెల్లడించారు.
ఇప్పుడు బ్రిటన్ పరిశోధనలో కీలక విషయాలు తెలిసిన అనంతరం హైడ్రాక్సీక్లోరోక్విన్ వాడకంపై పునరాలోచించాల్సిన పరిస్థితి ఏర్పడింది. ఇది కచ్చితంగా ప్రభావం చూపుతుందనేందుకు ఎలాంటి ఆధారాలు లేకపోయినా ప్రపంచ దేశాలు విరివిగా ఉపయోగిస్తున్నాయని హార్బీ చెప్పారు. ఇతర ప్రత్యామ్నాయ డ్రగ్స్పై పరిశోధనలు విస్తృతం చేయాలన్నారు.
