పంజాబ్ నేషనల్ బ్యాంకును మోసగించిన కుంభకోణంలో నిందితుడు మెహుల్ చోక్సీని సురక్షితంగా ఆంటిగ్వాకు తిరిగి తీసుకొచ్చే విషయంలో సాయం అందించాల్సిందిగా బ్రిటన్ రాణి ఎలిజబెత్కి విజ్ఞప్తి చేసేందుకు ఆయన భార్య ప్రీతి చోక్సీ సిద్ధమవుతున్నారు. ఈమేరకు తమ కుటుంబీకులు, న్యాయవాదులు రాణికి అర్జీ పెట్టుకోనున్నట్లు ప్రీతి తెలిపారు.
మెహుల్ ప్రస్తుతం డొమినికాలో పోలీసుల నిర్భంధంలో ఉన్న సంగతి తెలిసిందే. అక్కడి నుంచి అతనికి పౌరసత్వం ఉన్న ఆంటిగ్వా-బార్బుడాకు చోక్సీని తరలించే విషయంలో జోక్యం చేసుకోవాల్సిందిగా రాణిని కోరనున్నట్లు చెప్పారు. తన భర్తకు న్యాయం దక్కేందుకుగానుఆంటిగ్వా-బార్బుడా అధినేతగా సాయం అందించాల్సిందిగా బ్రిటన్ రాణికి రాయనున్నట్లు తెలిపారు. తన భర్త విషయంలో మానవహక్కుల ఉల్లంఘన జరిగిన విషయాన్ని రాణి దృష్టికి తీసుకెళ్లనున్నట్లు చెప్పారు.
