లండన్​లో సుదీర్ఘ కాలం లాక్​డౌన్!​

లండన్​లో లాక్​డౌన్ సుదీర్ఘకాలం పాటు కొనసాగే అవకాశముందని బ్రిటన్​ వైద్యశాఖ మంత్రి తెలిపారు. కరోనా కొత్త స్ట్రెయిన్ వ్యాప్తిని ఎదుర్కొనేందుకు కఠిన చర్యలు తీసుకోక తప్పదని స్పష్టంచేశారు.

లండన్​లో విధించిన లాక్​డౌన్ సుదీర్ఘకాలం కొనసాగవచ్చని బ్రిటన్ వైద్యశాఖ మంత్రి మాట్​ హాన్​కాక్​ అభిప్రాయపడ్డారు.

కరోనా విజృంభణను దృష్టిలో పెట్టుకుని లండన్​ సహా బ్రిటన్​లోని పలు ప్రాంతాల్లో దశల వారీగా ప్రభుత్వం లాక్​డౌన్ విధిస్తోంది.​ కొత్తరకం కరోనా వ్యాప్తి కూడా ఆంక్షలను పటిష్ఠం చేసేందుకు కారణమైంది. హాన్​కాక్ ఆదివారం నాడు​ చేసిన ఈ వ్యాఖ్యలు ప్రాధాన్యతను సంతరించుకున్నాయి.

"వ్యాక్సిన్ అందుబాటులోకి వస్తే కానీ వైరస్​ను అదుపు చేయలేం. ఈ కొత్త రకం అత్యంత వేగంగా వ్యాప్తి చెందుతుందన్న విషయం మన అందరికీ తెలుసు. దీనిని అదుపు చేసేందుకు పాతరకంపై తీసుకున్న వాటి కంటే కట్టుదిట్టమైన చర్యలు చేపట్టాలి."

-మాట్​ హాన్​కాక్, వైద్య శాఖ మంత్రి​

ఇప్పుడే చెప్పలేం...

ఆంక్షల సడలింపులు ఇప్పట్లో కష్టమేనని హాన్​కాక్ అభిప్రాయపడ్డారు. నాలుగో విడత లాక్​డౌన్ విధించిన కొన్ని గంటలకే ఈ వ్యాఖ్యలు చేయడం గమనార్హం. ఈ పరిస్థితిని ఎదుర్కోవడానికి ప్రజలు కూడా బాధ్యతగా వ్యవహరించాలని విజ్ఞప్తి చేశారు.

డిసెంబరు 19న లండన్ సహా ఇంగ్లాండ్ తూర్పు, ఆగ్నేయ ప్రాంతాల్లో రెండు వారాల లాక్​డౌన్ విధిస్తున్నట్టు ప్రధాని బోరిస్​ జాన్సన్ ఆదేశాలు జారీ చేశారు. డిసెంబరు 30న పరిస్థితి సమీక్షించి, తదుపరి చర్యలు తీసుకోనున్నారు.

బ్రిటన్​లో ఇప్పటివరకు 67,503 మంది కరోనా కారణంగా ప్రాణాలు కోల్పోయారు.

ఇదీ చూడండి : బ్రిటన్​ నుంచి ఇటలీకి పాకిన 'కొత్త రకం' కరోనా