నౌకదాడులపై బ్రిటన్​ రాయబారికి ఇరాన్​ సమన్లు

ఒమన్​ సమీపంలోని హొర్ముజ్​ జలసంధి వద్ద చమురు నౌకలపై దాడి చేసింది ఇరాన్ దేశమే అని  బ్రిటన్ ఆరోపించడాన్ని ఆ దేశం తీవ్రంగా తప్పుబట్టింది. బ్రిటన్​ రాయబారికి ఇరాన్​ విదేశీ వ్యవహారాలశాఖ సమన్లు జారీ చేసింది.

బ్రిటన్​పై ఇరాన్​ మండిపడింది. ఎటువంటి ఆధారాలు లేకుండా ఒమన్​ సమీపంలోని రెండు చమురు నౌకలపై దాడికి తామే కారణమని బ్రిటన్​ ఎలా ఆరోపిస్తుందని ప్రశ్నించింది.

ఈ మేరకు ఇరాన్​లోని బ్రిటన్​ రాయబారి రాబ్​ మెకైర్​కు ఆ దేశ విదేశీ వ్యవహారాల శాఖ సమన్లు జారీ చేసింది. బ్రిటన్​ విదేశాంగ శాఖ తప్పుడు, అవాస్తవమైన ఆరోపణలు చేస్తోందని నోటీసులో పేర్కొంది.

బ్రిటన్​ విదేశాంగ కార్యదర్శి జెరేమీ హంట్ ఓ ప్రకటనలో ఒమన్​ సమీపంలోని చమురు నౌకలపై దాడి చేసింది ఇరాన్​ దేశమే అని అభిప్రాయపడ్డారు.

ఏం జరిగింది..?

అత్యంత రద్దీగా ఉండే హొర్ముజ్​ జలసంధిలో ఈ నెల 13న ఉదయం గంట వ్యవధిలో రెండు చమురు ఓడలపై దాడి జరిగింది. వాటిలోని నావికులు సురక్షితంగా బయటపడ్డారు. అమెరికా నౌకాదళం అక్కడకు చేరుకుని సాయం అందించింది.

ఇదీ చూడండి: బ్రిటన్​ టెక్​ వీసా దరఖాస్తుల్లో భారత్​ టాప్​