కరోనా వైరస్ ప్రపంచవ్యాప్తంగా మరణమృదంగం మోగిస్తోంది. మహమ్మారి ప్రభావం ఇరాన్లో తీవ్రంగా కనిపిస్తోంది. ఒక్కరోజే వైరస్ బారిన పడి మరో 129 మంది మృతిచెందినట్లు ఆ దేశ అధికారులు సోమవారం వెల్లడించారు. దీంతో అక్కడ మొత్తం మరణాల సంఖ్య 853కు చేరుకుంది. దేశ వ్యాప్తంగా 14, 991 కరోనా కేసులు నమోదైనట్లు తెలిపారు.
ఇరాన్ అసెంబ్లీ సీనియర్ నేత అయతోల్లా హషేమ్ బేతాయ్ (78) వైరస్ సోకి మరణించినట్లు ఆ దేశ మీడియా వెల్లడించింది. అంతేకాకుండా కేబినెట్ మంత్రులు, పార్లమెంట్ సభ్యులు, రెవల్యూషనరీ గార్డ్ మెంబర్స్, ఆరోగ్య మంత్రిత్వ శాఖకు చెందిన అధికారులు వైరస్ బారిన పడినట్లు అధికారులు స్పష్టం చేశారు. వైరస్ వేగంగా వ్యాప్తి చెందుతున్న నేపథ్యంలో ఇరాన్ ప్రభుత్వం మొత్తం లక్షా పదివేల పడకలను సిద్ధం చేసింది.
స్పెయిన్లో జాతీయ విపత్తుగా..
స్పెయిన్లో 24 గంటల వ్యవధిలో దాదాపు వెయ్యి కరోనా కేసులు నమోదైనట్లు ఆ దేశ ఆరోగ్య వర్గాలు వెల్లడించాయి. తాజా కేసులతో ఇప్పటి వరకు దేశవ్యాప్తంగా వైరస్ బారిన పడిన వారి సంఖ్య 8,744కు చేరింది. ఇందులో దేశ రాజధాని మాడ్రిడ్లో 4,665 కేసులు నమోదుకావడం గమనార్హం.
తాజాగా 9 మంది మృతి చెందగా.. మొత్తం మరణాలు 297కి చేరినట్లు పేర్కొన్నారు. ఈ నేపథ్యంలో స్పెయిన్ ప్రభుత్వం కరోనాను జాతీయ విపత్తుగా ప్రకటించింది. 46 మిలియన్ల మంది గృహ నిర్బంధంలోనే ఉన్నారు.
కరోనాపై అవగాహన...
అమెరికాలో కరోనా కారణంగా ఇబ్బందులు పడుతున్న భారతీయ విద్యార్థులకు సాయం చేయడం కోసం సేవా ఇంటర్నేషనల్ సంస్థ, ఇండో- అమెరికా స్వచ్ఛంద సంస్థలు కలిసి పని చేస్తున్నాయి. 20 మంది డాక్టర్లతో 24గంటల పాటు కరోనా అవగాహన కార్యక్రమాలను చేపట్టడానికి 10 వేల అమెరికన్ డాలర్లను కేటాయించాయి.
కలిసి పోరాడుదాం..
కరోనాను కట్టడి చేయడంపై ఐరోపా సమాఖ్య నేతలు వీడియో కాన్ఫరెన్స్లో చర్చించారు. మహమ్మారిపై కలిసికట్టుగా పోరాడదాం అని పిలుపునిచ్చారు.
ఇది చదవండి: కరోనా దెబ్బకు అమెరికా 14 రోజులు బంద్!
