మహా కుంభమేళాకు వెళ్తున్నారా? - ఈ టిప్స్​ పాటిస్తే మీ జర్నీసేఫ్ అండ్​ హ్యాపీ​!

-అతి పెద్ద ఆధ్యాత్మిక ఉత్సవం మహా కుంభమేళా -కుంభమేళాకు వెళ్లేవారు ఈ జాగ్రత్తలు పాటిస్తే మంచిది

Maha Kumbh Mela 2025 Traveling Tips : ఆధ్యాత్మిక కార్యక్రమాల్లో అతి పెద్దది మహా కుంభమేళా. ఈ సందర్భంగా పవిత్ర నదుల్లో స్నానం చేయడం ముక్తి, మోక్ష మార్గమని భావించి లక్షల సంఖ్యలో భక్తులు వెళ్తుంటారు. కేవలం దేశీయులు మాత్రమే కాకుండా విదేశీ యాత్రికులు సైతం ఈ కుంభమేళాకు వెళ్తుంటారు. మరి, జనవరి 13వ తేదీ నుంచి ఉత్తరప్రదేశ్​ ప్రయాగ్​రాజ్​లో ప్రారంభంకానున్న కుంభమేళాకు మీరూ వెళ్దామనుకుంటున్నారా? అయితే కొన్ని టిప్స్ పాటిస్తే మంచిదని నిపుణులు చెబుతున్నారు. ఈ టిప్స్​ పాటిస్తే మీరు హ్యాపీ జర్నీని ఎంజాయ్​ చేయవచ్చని చెబుతున్నారు. అవేంటో ఇప్పుడు చూద్దాం.

ముందుగానే బుక్ చేసుకోవాలి: మీరు మహా కుంభమేళాకు వెళ్లాలనుకుంటే జర్నీ కోసం, స్టేయింగ్​ కోసం ముందుగానే బుక్ చేసుకుంటే మంచిదని చెబుతున్నారు. ఎందుకంటే ప్రయాగ్​రాజ్‌ కుంభమేళాకు ప్రపంచం నలుమూలల నుంచి లక్షలాది మంది పర్యాటకులు, భక్తులు తరలివస్తారు. ఈ క్రమంలోనే అక్కడికి వెళ్లిన తర్వాత ఇబ్బంది పడకూడదంటే ముందే ప్లాన్​ చేసుకోవాలి. అందుకోసం ఎలా వెళ్లాలి? వెళ్లిన తర్వాత ఎక్కడ స్టే చేయాలి అనే విషయాలు ముందుగానే తెలుసుకోవాలి. అవసరమైతే ప్రభుత్వ ట్రావెల్ ఏజెన్సీల సహాయం తీసుకోవచ్చు.

ప్యాకింగ్: కుంభమేళాకు వెళ్లేందుకు కావాల్సిన, అవసరమైన వస్తువులను ముందుగానే ప్యాక్ చేసుకోవాలి. అక్కడికి వెళ్లిన తర్వాత అవి లేవు ఇవి లేవు అని టెన్షన్​ పడకుండా కావాల్సిన అన్నింటినీ ముందే సర్దుకోవాలి. నడిచేందుకు అనువుగా ఉండే ఫుట్​వేర్​ తీసుకెళ్లాలి. స్నానం చేసిన తర్వాత తడికి కాలు జారిపోకుండా గ్రిప్​నిచ్చే చెప్పులు, షూలు ఎంచుకుంటే మంచిది. అక్కడి ఉష్ణోగ్రతలను బట్టి డ్రెస్సింగ్ ఉండాలి. అలాగే మందులు వాడుతున్న వారు కూడా వీటిని వెంట తీసుకెళ్లాలి.

ఆరోగ్యం కోసం: కుంభమేళాకు లక్షల్లో జనం వస్తుంటారు. ఈ క్రమంలో వైరస్​లు ప్రబలే అవకాశం చాలా ఎక్కువగా ఉంటుంది. ఇప్పటికే చైనా వైరస్​ జనాలను భయపెడుతున్న క్రమంలో మాస్క్, శానిటైజర్​ కచ్చితంగా వెంట తీసుకెళ్లాలి. తినే తిండి, తాగే వాటర్​ విషయంలో కూడా జాగ్రత్తగా ఉండాలి. స్నాక్స్​ తినాలనుకున్నప్పుడు బయటివి కాకుండా ఇంట్లో తయారు చేసినవి తీసుకెళితే మరీ మంచిదని, ఫ్రూట్స్​ కూడా తగినన్ని వెంట తీసుకెళ్లాలని చెబుతున్నారు. అలాగే సెపరేట్​ వాటర్​ బాటిల్స్​ తీసుకెళ్లాలని సూచిస్తున్నారు.

విలువైన వస్తువులు వద్దు: జన సందోహం అధికంగా ఉండే ప్రాంతాలకు వెళ్లినప్పుడు విలువైన వస్తువులు తీసుకెళ్లకపోవడమే మంచిదంటున్నారు. మొబైల్​ ఫోన్​, డబ్బులు, ఐడెంటిటీ కార్డులు జాగ్రత్తగా భద్రపరచుకోవాలని చెబుతున్నారు. సింగిల్​గా కాకుండా ఫ్రెండ్స్​, ఫ్యామిలీ వెళ్లినప్పుడు మరింత జాగ్రత్తగా ఉండాలంటున్నారు.

లిక్విడ్ క్యాష్​ అందుబాటులో ఉండాలి: ప్రస్తుతం ఆన్​లైన్​ పేమెంట్స్ ఎక్కువయ్యాయి. అయితే ఇలాంటి ఆధ్యాత్మిక కార్యక్రమాలకు వెళ్లినప్పుడు లిక్విడ్​ క్యాష్​ను దగ్గర ఉంచుకోవాలని, అత్యవసర సమయాల్లో ఇది ఉపయోగపడుతుందని చెబుతున్నారు.

స్నానం సమయంలో జాగ్రత్త అవసరం: స్నానానికి నీటిలోకి దిగినప్పుడు జాగ్రత్తగా ఉండాలని అంటున్నారు. ఎందుకంటే జనం ఎక్కువ ఉన్నప్పుడు తొక్కిసలాట జరిగే ప్రమాదం ఉంటుంది కాబట్టి జాగ్రత్తగా ఉండాలంటున్నారు. అలాగే ఈతరానివారు లోతుగా ఉండే ప్రదేశాలకు వెళ్లొద్దని నది ఒడ్డునే స్నానం చేయడం మంచిదని సూచిస్తున్నారు.