ప్రపంచ వ్యాప్తంగా కరోనా విలయతాండవం కొనసాగుతోంది. బాధితుల సంఖ్య 36 లక్షల 43 వేలు దాటింది. ఇప్పటివరకూ 2 లక్షల 52 వేల మందికిపైగా ప్రాణాలు కోల్పోయారు. ప్రపంచవ్యాప్తంగా 11 లక్షల 94 వేల మందికిపైగా కొవిడ్ నుంచి కోలుకున్నారు.
ఐరోపాలో వైరస్ వ్యాప్తి క్రమంగా తగ్గుముఖం పడుతుంటే.. మరోవైపు అమెరికా దేశాల్లో కేసులు, మరణాలు పెరిగిపోతున్నాయి. ముఖ్యంగా యూఎస్ఏ, కెనడా, మెక్సికో, బ్రెజిల్లు తీవ్రంగా ప్రభావితమవుతున్నాయి.
అమెరికాలో కేసులు 12 లక్షల 12 వేలు దాటాయి. మొత్తం మరణాల సంఖ్య 70 వేలకు చేరువైంది. 24 గంటల వ్యవధిలో దేశంలో 1015 మంది మరణించినట్లు జాన్స్ హాప్కిన్స్ వర్సిటీ వెల్లడించింది. నెల వ్యవధిలో ఇదే స్వల్పమని గణాంకాలు స్పష్టం చేస్తున్నాయి.
బ్రెజిల్లో ఒక్కరోజే 318 మంది మరణించగా.. కొత్తగా 7 వేల మందికిపైగా వైరస్ బారినపడ్డారు. కెనడాలో మరో 172, మెక్సికోలో 93 మంది ప్రాణాలు కోల్పోయారు.
ఐరోపా దేశాల్లో...
- స్పెయిన్లో కరోనా మరో 164 మందిని బలితీసుకుంది. మృతుల సంఖ్య 25 వేల 428కి పెరిగింది. మొత్తం కేసులు 2 లక్షల 48 వేలు దాటాయి.
- ఇటలీలో కొత్తగా 195 మంది చనిపోయారు. మొత్తం మరణాలు... 29 వేల 79కి చేరాయి.
- బ్రిటన్‌లో సోమవారం కనిష్ఠంగా 288 మంది మరణించారు. మొత్తం మృతుల సంఖ్య 28 వేల 734కి పెరిగింది. దేశంలో కొత్తగా 4 వేల కేసులు నమోదయ్యాయి. బాధితుల సంఖ్య లక్షా 90వేలు దాటింది.
- ఫ్రాన్స్‌లో మరో 306 మంది మరణించగా.. కరోనా కేసులు లక్షా 69 వేల 462కు చేరాయి. మొత్తం 25 వేల 200 మంది చనిపోయారు.
- జర్మనీలో లక్షా 66 వేలపైగా మందికి కరోనా సోకింది. మరో 127 మంది చనిపోగా ఇప్పటి వరకు 6 వేల 866 మరణాలు సంభవించాయి.
రష్యాలో అంతకంతకూ..
రష్యాలోనూ కరోనా శాంతించడంలేదు. కొత్తగా 10వేలకుపైగా కేసులు నమోదుకాగా మొత్తం కేసులు లక్షా 45 వేలు దాటాయి. ఇప్పటివరకు 13 వందలకుపైగా బాధితులు వైరస్ కారణంగా మరణించారు. టర్కీలోనూ వైరస్ వేగంగా విస్తరిస్తోంది. ఆ దేశంలో కేసుల సంఖ్య లక్షా 27 వేల 659కి చేరింది. 3 వేలకుపైగా మరణాలు నమోదయ్యాయి.
ఇరాన్‌లో 98 వేల 647 మందికి కరోనా సోకగా మృతుల సంఖ్య 6 వేల 277కి చేరింది. పాకిస్థాన్‌లో మృతుల సంఖ్య 476కు చేరింది. బాధితుల సంఖ్య 20 వేల 941కి పెరిగింది. న్యూజీలాండ్‌లో కొత్త కేసులేవీ నమోదు కాలేదని ఆ దేశ ప్రభుత్వం ప్రకటించింది.
