బెల్జియమ్ రాజధాని బ్రెసెల్స్లోని రాయల్ మ్యూజియమ్ ఆఫ్ ఫైన్ ఆర్ట్స్ చారిత్రక పెయింటింగ్లకు నెలవు. ఒక్కసారి గ్రాండ్రూమ్లో ప్రవేశిస్తే 15వ శతాబ్దం నాటి ప్రముఖ చిత్రకారుల కళాఖండాలు మిమ్మల్ని ఆబ్బురపరుస్తాయి. ఇందులో ప్రధానంగా ప్రఖ్యాతి చిత్రకారుడు పీటర్ బ్రూగెల్ 1562లో రూపొందించిన 'ది ఫాల్ ఆఫ్ ద రెబల్ ఏంజల్స్' పెయింటింగ్ ఈ తరానికి దర్శనమిస్తోంది. వాటిని చూస్తే తీసుకెళ్లి ఇంట్లో పెట్టుకోవాలనిపిస్తుంది. కానీ కుదరని పని. ఇదంతా నిన్నటివరకు.
ఇప్పుడు మీకు నచ్చిన పెయింటింగ్స్ను మీ లివింగ్ రూమ్లో దర్జాగా పెట్టుకొని చూడచ్చు. ప్రముఖ ఎలక్ట్రానిక్ దిగ్గజం సామ్సంగ్ ఇందుకు కృషి చేస్తోంది. మ్యూజియంతో జరిగిన ఒప్పందంలో భాగంగా 22 ప్రముఖ చిత్రపటాలు టీవీలో పొందుపరిచారు. ఆర్ట్స్ స్టోర్ ఐచ్ఛికం ద్వారా వాటిని వీక్షించవచ్చు.
"టీవీలో వీక్షించడానికి సబ్స్క్రిప్షన్ పద్దతిలో పెయింటింగ్స్ అందుబాటులో ఉంటాయి. నెలకు ఐదు యూరోలు చెల్లిస్తే పరిమితం లేకుండా అన్ని చిత్రాలను చూడొచ్చు. దాదాపు 12వందల ప్రఖ్యాత కళాచిత్రాలు టీవీలో పొందుపరిచి ఉంటాయి. ఇంకో ఐచ్ఛికంలో ఒక్కో చిత్రానికి ప్రత్యేకంగా చెల్లించవచ్చు. ఇందుకు 20 యూరోలు ఖర్చవుతుంది."
-జాన్ వాన్, సామ్సంగ్ లైఫ్స్టైల్ ప్రాజెక్ట్ మేనేజర్.
సామ్సంగ్ ఇంతకుముందే ఇలాంటి కార్యక్రమాలు ఇతర దేశాల్లో చేపట్టింది. లండన్ టేట్ గ్యాలరీ, ప్లోరెన్స్లోని ఉఫ్పీజీ మ్యూజియం, ఆమ్స్టర్డామ్ వాన్ గోఘ్ మ్యూజియంలలో సాంకేతికను జోడించింది.
టీవీలో ప్రధానంగా చిత్రాన్ని పెద్దదిగా చేసుకొని చూసే సదుపాయాన్ని కల్పించారు. సామ్సంగ్ ప్రదర్శించబోయే చిత్రాల్లో 1566 నాటి 'సెన్సెస్ అట్ బెత్లబమ్' పెయింటింగ్ ఆకట్టుకుంటుంది.
"మేము సామ్సంగ్ కంపెనీతో ముందుకెళ్లాలనుకుంటున్నాము. ప్రస్తుత సాంకేతికత కారణంగా ఈ చిత్రకళను త్వరగా విస్తరించొచ్చనే ఆలోచనతో ఈ నిర్ణయం తీసుకున్నాము. సామ్సంగ్ టీవీలో మీరు ఇంట్లోనే ఈ కళాకృతులను చూడొచ్చు. ఇలా వాటిని చూశాక మ్యూజియమ్లో ఉన్న అసలైన చిత్రాలను చూడటానికి వస్తారని ఆశిస్తున్నాము."
-ఇసాబెల్లి వాన్హొనాకర్, మ్యూజియమ్ మేనేజింగ్ డైరక్టర్
ప్రస్తుతం ప్రపంచ వ్యాప్తంగా ఉన్న మ్యూజియాలన్నీ టెక్నాలజీతో ముడిపడి ఉన్నాయి. కానీ బెల్జియం మ్యూజియం ఇప్పటివరకు సాంకేతికతను అందిపుచ్చుకోలేదు. ఈ నేపథ్యంలో మొదటిసారి సామ్సంగ్ భాగస్వామ్యంతో ప్రజలకు చేరువయ్యేందుకు ప్రయత్నిస్తున్నట్లు మ్యూజియం నిర్వాహకులు తెలిపారు.
ఇలా సాంకేతికత సాయంతో ప్రజలకు చారిత్రక కళాఖండాలను దగ్గర చేసేందుకు వినూత్న ప్రయత్నం చేస్తున్నారు.
