భారత్లో రాజకీయంగా తీవ్ర చర్చనీయాంశమైన పౌరసత్వ సవరణ చట్టంపై తమ పార్లమెంట్లో తీర్మానాన్ని ప్రతిపాదించడానికి ఐరోపా సమాఖ్య ప్రతినిధులు సిద్ధమవుతున్నట్లు తెలుస్తోంది. కశ్మీర్ అంశం సహా పౌరసత్వ సవరణ చట్టంపై ఆరు పార్టీలు ఆరు వేర్వేరు తీర్మానాలను ప్రతిపాదించనున్నట్లు తెలుస్తోంది. బ్రసెల్స్లో జనవరి 29న జరిగే సమావేశాల్లో దీనిపై చర్చించనున్నట్లు సమాచారం.
తీర్మానంలో ఏముంది?
అంతర్జాతీయ మానవహక్కుల నిబంధనలను భారత్ ఉల్లంఘించిందనే ఆరోపణలపై తాజా తీర్మానాన్ని ప్రతిపాదించినట్లు తెలుస్తోంది. ఆర్టికల్-370 రద్దు అనంతరం జమ్ము కశ్మీర్లో రాజకీయ నాయకుల గృహనిర్బంధం, సమాచార వ్యాప్తిపై ఆంక్షలు వంటి అంశాలపైనా చర్చించనున్నట్లు సమాచారం. ఉత్తర్ప్రదేశ్లో సీఏఏ వ్యతిరేక నిరసనకారులపై పోలీసుల కాల్పులు సహా నిర్బంధించి హింసించారని తీర్మానంలో పార్లమెంట్ సభ్యులు ఆరోపించారు. జాతీయ పౌర పట్టిక అమలు ద్వారా ప్రపంచంలో స్థిర నివాసం లేనివారి సంక్షోభానికి కారణమవుతుందని తీర్మానంలో పేర్కొన్నారు.
భారత్లో సీఏఏ వ్యతిరేక నిరసనకారులపై ప్రభుత్వం చేపడుతోన్న చర్యలు వారి ప్రాణాలకు ముప్పుగా మారాయని తీర్మానంలో ఆరోపించారు ఈయూ పార్లమెంట్ సభ్యులు. నిరసనకారులతో చర్చించాలని ప్రధాని మోదీకి సూచించారు. కశ్మీర్లో ఆంక్షలు ఎత్తివేయాలని కోరారు. అంతర్జాతీయ బాధ్యతగా... సమానత్వాన్ని, అవివక్షతలను పాటిస్తూ సీఏఏను పునఃసమీక్షించాలని తీర్మానంలో స్పష్టం చేశారు.
భారత్ స్పందన
ప్రజాస్వామ్యబద్దంగా ఏర్పాటు చేసినన చట్టానికి చెందిన హక్కులు, అధికారాలను తోటి ప్రజాస్వామ్య దేశాలుగా ప్రశ్నించకూడదని భారత ప్రభుత్వం స్పష్టం చేస్తోంది.
ఈ వ్యవహారంపై భారత విదేశాంగ శాఖ అధికారికంగా స్పందించనప్పటికీ... సీఏఏ పూర్తిగా దేశ అంతర్గత విషయమని అధికారులు స్పష్టం చేస్తున్నారు. తీర్మానాన్ని ప్రతిపాదించే ముందు చట్టానికి సంబంధించి పూర్తి వాస్తవాలను తెలుసుకోవాలని, చట్టంపై అవగాహన కోసం భారత ప్రభుత్వాన్ని సంప్రదించాలని ఈయూ సభ్యులకు సూచిస్తున్నారు.
"ఈయూ పార్లమెంట్కు చెందిన కొంతమంది సభ్యులు సీఏఏపై ముసాయిదా తీర్మానాన్ని ప్రతిపాదించాలనుకుంటున్నట్లు తెలిసింది. సీఏఏ పూర్తిగా భారతదేశ అంతర్గత విషయం. అంతకుమించి... పార్లమెంట్లో చర్చలు నిర్వహించిన తర్వాత పూర్తి ప్రజాస్వామ్యబద్ధంగా ఈ చట్టం రూపొందించాం. సహజత్వానికి మార్గనిర్దేశనం చేసే సమాజం... సందర్భాన్ని, ప్రమాణాలను రెండింటినీ పరిశీలిస్తుంది. ఇది వివక్ష కాదు. నిజానికి ఐరోపా సమాజాలు కూడా ఇదే వైఖరి అవలంబించాయి. తీర్మానానికి మద్దతిచ్చేవారందరూ మమ్మల్ని సంప్రదించి పూర్తి వాస్తవాలు తెలుసుకొని ముందుకెళ్తారని ఆశిస్తున్నాం."
-అధికారిక వర్గాలు
భారత్-ఈయూ సదస్సుపై ప్రభావం
ప్రస్తుత పరిణామాలు మార్చి 13న భారత్-ఈయూ మధ్య జరిగే సదస్సుపైనా ప్రభావం చూపే అవకాశం ఉంది. బ్రసెల్స్లో జరిగే సదస్సులో మోదీ పాల్గొననుండగా.. ఈ తీర్మానాలపై చర్చించే అవకాశం ఉన్నట్లు తెలుస్తోంది.
ఈయూకు ఫ్రాన్స్ ఝలక్!
ఈయూలో భాగస్వామి అయిన ఫ్రాన్స్.... సీఏఏపై కీలక వ్యాఖ్యలు చేసింది. ఈ చట్టం... భారత దేశ అంతర్గత రాజకీయ వ్యవహారమని తేల్చిచెప్పింది.
