ఒక్క వ్యక్తి కోసం ఏకంగా ఓ విమానమే నడిచిన ఘటన బ్రిటన్‌లో శుక్రవారం చోటుచేసుకుంది. వివరాల్లోకి వెళితే.. కరోనా వైరస్‌ సమయంలో ప్రవాసీయులను తరలించేందుకు బ్రిటన్ హోమ్‌ ఆఫీస్‌ ఏర్పాటు చేసిన ఈ విమానంలో నిజానికి 30 మంది వెళ్లాల్సి ఉంది. అయితే చివరి నిముషంలో న్యాయపరమైన చిక్కులు ఎదురవ్వటంతో 29 మంది ఆగిపోవాల్సి వచ్చింది. వారు బ్రిటన్ వదిలి వెళ్లకుండా ఉండేందుకు శరణార్థుల తరఫు న్యాయవాదులు చివరి క్షణం వరకు ప్రయత్నించారు. ఈ క్రమంలో వారి తరఫున వివిధ న్యాయస్థానాల్లో పిటిషన్లు వేశారు.
ఈ ప్రవాసీయులు న్యాయస్థానంలో దాఖలు చేసిన కారణాలు అర్థంలేనివని.. అయినా వాటిని న్యాయస్థానం స్వీకరించిందని ఓ ఉన్నతాధికారి వాపోయారు. వారు దేశాన్ని వదిలి వెళ్లకుండా ఉండేందుకే విమానం బయలుదేరే చివరి నిముషంలో కోర్టుకు అప్పీలు చేసుకున్నారని ఆయన ఆరోపించారు. దీంతో మిగిలిన ఒక్క ప్రయాణికుడితో ఆ విమానం ఫ్రాన్స్కు బయలుదేరింది. అందులో ప్రయాణించింది సూడాన్‌కు చెందిన ఓ వ్యక్తి. కాగా, ఈ 'ఒకే ఒక్కడి' కోసం అయిన ఖర్చు 1,00,000 పౌండ్లు(దాదాపు రూ.94 లక్షలపైనే).
