కరోనా రోజురోజుకూ విస్తరిస్తూనే ఉంది. ప్రపంచవ్యాప్తంగా ఇప్పటివరకు 4 లక్షల 66 వేల మందికిపైగా వైరస్ సోకగా.. మరణాల సంఖ్య 21వేలు దాటింది. 196 దేశాల్లో 21 వేల 180 మంది ప్రాణాలు కోల్పోయారు. ఐరోపాలో కొవిడ్-19 వ్యాప్తి అధికమవుతోంది. ఇటలీలో కొత్త కేసులు కాస్త తగ్గుముఖం పట్టినప్పటికీ మరణాలు మాత్రం తగ్గడం లేదు. అక్కడ ఒక్కరోజే 683 మంది మృతి చెందారు. మొత్తం మరణాలు 7 వేల 500దాటాయి. 5 వేల 210 కొత్త కేసులు నమోదవగా.. మొత్తం కేసుల సంఖ్య 74 వేల 386కు చేరింది.
చైనాను దాటిన స్పెయిన్..
ప్రకృతి అందాలకు పెట్టింది పేరైన స్పెయిన్.. ఇటలీ తర్వాత అంతటి ఆందోళనకర పరిస్థితుల్లోకి వెళ్లింది. ఒక్కరోజులోనే అక్కడ 783 మందిని కరోనా బలితీసుకుంది. మొత్తం కేసులు 50 వేలకు సమీపంలో ఉండగా.. మరణాలు 3, 647కు చేరాయి.
అమెరికాలో...
కొవిడ్-19 అమెరికాలో రోజురోజుకూ తీవ్రరూపం దాల్చుతోంది. 24 గంటల వ్యవధిలో మరోసారి అక్కడ కొత్త కేసులు దాదాపు 10వేలకు చేరాయి. మొత్తం మృతుల సంఖ్య 900 దాటింది. పరిస్థితులు విషమిస్తున్న తరుణాన న్యూయార్క్కు 24 లక్షల మాస్కులు, 1.35 కోట్ల చేతి తొడుగులు, 4 వేల వెంటిలేటర్లను పంపించనున్నట్లు తెలిపారు అధ్యక్షుడు డొనాల్డ్ ట్రంప్.
కరోనా నిర్ధరణ కిట్లను సరఫరా చేయాల్సిందిగా దక్షిణ కొరియాను కోరారు. కొవిడ్ తీవ్రతకు కుదేలవుతున్న అమెరికా ఆర్థిక వ్యవస్థను గాడిలో పెట్టేందుకు ఉద్దేశించిన 2 లక్షల కోట్ల డాలర్ల ఉద్దీపన ప్యాకేజీ ఆమోదంపై సెనేట్, శ్వేతసౌధం ఒప్పందం కుదుర్చుకున్నాయి.
ఒక్కరోజులో ఫ్రాన్స్లో 231, ఇరాన్లో 143, నెదర్లాండ్స్లో 80, బెల్జియంలో 56, జర్మనీలో 47 మంది మృత్యువాతపడ్డారు.
యూకేలో మరణాల సంఖ్య 465కు చేరింది. 1452 కొత్త కేసులతో మొత్తం కేసులు 9,529గా ఉన్నాయి. చైనాలో బుధవారం రోజు నలుగురు చనిపోగా.. 47 కొత్త కేసులు నమోదయ్యాయి. దాయాది దేశం పాకిస్థాన్లో 91 కొత్త కేసులతో మొత్తం 1063 మంది బాధితులున్నారు. మరణాల సంఖ్య 8గా ఉంది. కేసులు పెరుగుతున్న కారణంగా.. దేశీయ విమానాల రాకపోకలపై ఇమ్రాన్ సర్కారు ఆంక్షలు విధించింది. రష్యాలో రెండో కొవిడ్ మరణం చోటుచేసుకుంది.
